जळगाव : रेकॉर्डवरील गुन्हेगारांच्या अल्पवयीन साथीदारास चोरीच्या चार मोटार सायकलींसह स्थानिक गुन्हे शाखेच्या पथकाने ताब्यात घेतले आहे. ताब्यातील अल्पवयीनचा मास्टर माईंड गुन्हेगार फरार असून पोलिस त्याच्या मागावर आहेत. (Bacha Gang of staunch criminal on record Jalgaon latest crime news)

जळगाव शहरातील हरिविठ्ठलनगर भागातील रहिवासी तसेच पोलिस रेकॉर्डवरील अट्टल गुन्हेगार अल्पवयीन साथीदारांच्या मदतीने मोटारसायकल चोरी करत असल्याची माहिती स्थानिक गुन्हे शाखेचे निरीक्षक किरणकुमार बकाले यांना खबऱ्यांकडून समजली होती.

चोरीच्या मोटार सायकलींची विल्हेवाट लावत असतानाच गुन्हे शाखेच्या पथकातील जितेंद्र पाटील, अक्रम शेख, महेश महाजन, विजय पाटील, प्रीतम पाटील, नितीन बाविस्कर, अविनाश देवरे, सचिन महाजन, भारत पाटील अशांच्या पथकाने हरिविठ्ठलनगरातून या अल्पवयीन संशयिताला ताब्यात घेतले.

पोलिसी खाक्या दाखवताच त्याने एकामागून एक अशा चार चोरीच्या मोटारसायकल काढून दिल्या आहे. त्याच्या साथीदाराचा पोलिस शोध घेत आहे.

बच्चा गॅंग सक्रिय

रेकॉर्डवरील गुन्हेगाराने परिसरातील अल्पवयीन मुलांना पैशांचे आमिष देत त्यांना चोरीच्या गुन्ह्यात ओढले असून पोलिसांनी ताब्यात घेतलेला विधिसंघर्षीत अल्पवयीन मुलगा आयटीआयचे शिक्षण घेत असून त्याच्यासह इतरही अल्पवयीन मुल यात गुंतले असण्याची शक्यता वर्तवली जात आहे.