जळगाव : जिल्ह्यामध्ये अब्दुल खालिक देशमुख हे एक जुने जाणते नाव आहे. इंदिरा गांधी, राजीव गांधी आणि सोनियाजी यांच्या कार्यकाळ हा त्यांचा उमेदीचा काळ होता. बाळकृष्ण वासनिक, खा. मुकुल वासनिक यांच्या खांद्याला खांदा लावून त्यांनी काँग्रेसचे काम केले आहे. सध्या ते वयोवृद्ध असून नुकतीच त्यांच्या डोळ्याची शस्त्रक्रिया झाली आहे, तरी पण ते रविवारी राहुल गांधी यांची प्रत्यक्ष भेट घेणार आहेत.

अब्दुल खालिक देशमुख हे जिल्ह्यात खालीक बाप्पू या नावाने ते सुपरिचित आहेत. लोकसभा असो, विधानसभा ते सातत्याने सक्रिय असतात. प्रत्येक निवडणुकीतील विजयासाठी खालिकबाप्पूंनी रक्ताचे पाणी केले. खासदार राहुल गांधी यांच्या भारत जोडो यात्रेने ते फारच भारावून गेले असून राहुल गांधी यांना भेटण्याची त्यांची तीव्र इच्छा आहे.

३७ वर्षांपूर्वी राजीवजींची भेट

सन १९८५ मध्ये मुंबई येथे काँग्रेसचे राष्ट्रीय अधिवेशन भरले होते. या अधिवेशनात खालिक देशमुख हे प्रत्यक्ष उपस्थित होते. या अधिवेशनात एका प्रसंगी तत्कालीन पंतप्रधान राजीव गांधी दूर काही अंतरावर नेत्यांच्या घोळक्यात होते. अधिवेशनाची सर्व जबाबदारी खासदार मुरली देवरा यांच्याकडे होती. बापूंनी राजीवजींना भेटण्याची इच्छा देवरांकडे व्यक्त केली. परंतु ‘राजीवजींना भेटण्याचा आग्रह धरू नका, अन्यथा तुम्हाला पोलिसांच्या स्वाधीन करावे लागेल.’ असे देवरा खालिकबापूंना म्हणाले.

देवरा यांचे हे शब्द ऐकून ह्या सच्चा काँग्रेसशी कार्यकर्त्याचा राग अनावर झाला व त्यांनी उच्च स्वरात देवरांना सुनावले. ‘पोलिसांच्या हवाली काय करता, गोळी मारा, पण मी राजीवजींना भेटल्याशिवाय येथून हलणार नाही.’, असे ते जोरात म्हणाले. त्यामुळे राजीवजींचे लक्ष त्यांच्याकडे आवाजाकडे गेले. ते तात्काळ तिथे आले आणि घडलेल्या प्रकाराची चौकशी केली. नंतर खालिक बापूंनी हस्तांदोलन करत त्यांच्याशी बराच वेळ चर्चा केली आणि एवढेच नव्हे तर छायाचित्रही काढून घेतले. आपला हा काँग्रेसप्रवास कथन करताना बाप्पू गहिवरून आले होते.