जळगाव : शिवाजीनगरात भररस्त्यात पाणी सोडण्याच्या व्हॉल्व्हचा मोठा खड्डा झाल्यामुळे अपघाताचा धोका निर्माण झाला आहे. नागरिक जीव धोक्यात घालून वाहन चालवित आहेत. (Latest Marathi News)

शिवाजीनगर, तसेच हुडको भागात पाणीपुरवठ्यासाठी कानळदा रोड कॉर्नरच्या रस्त्यावर ‘व्हॉल्व्ह’ करण्यात आला आहे. या व्हॉल्व्हचा खड्डा ऐवढा मोठा झाला आहे, की त्यात वाहनास अपघात होत आहेत. या खड्ड्यात मंगळवारी (ता. १६) एकाचे पुढचे चाक अडकले होते. सुदैवाने कोणताही मोठा अपघात झाला नाही. नागरिकांच्या मदतीने ही कार बाहेर काढण्यात आली. त्यानंतर नागरिकांनी या व्हॉल्व्हच्या खड्ड्यात पुन्हा अपघात होऊ नये, यासाठी त्याच्या अवतीभवती मोठे दगड ठेवले आहेत.

पाणीपुरवठ्याचा हा व्हॉल्व्ह रस्त्यातून दुसऱ्या जागेवर करावा, अशी मागणी नागरिकांनी अनेक वेळा केली. मात्र, महापालिकेच्या अधिकाऱ्यांनी त्याकडे लक्ष दिलेले नाही. भररस्त्यात हा व्हॉल्व्ह असल्यमुळे तो धोकादायक झाला आहे. महापालिकेच्या अधिकाऱ्यांनी तातडीने लक्ष घालून हा व्हॉल्व्हचा खड्डा भरावा, अशी मागणी नागरिकांनी केली आहे. या ठिकाणी अपघात झाल्यास महापालिका अधिकाऱ्यांना जबाबदार धरण्यात येईल, अशी तक्रारही नागरिकांनी केली आहे.