एरंडोल - विवाहाला केवळ पाच दिवस शिल्लक असताना, २५ वर्षीय नवरदेवाचा बुधवारी (ता. २०) सकाळी नऊच्या सुमारास शेतातील विहिरीत पडून मृत्यू झाला. वराच्या अचानक मृत्यूमुळे परिवारासह मित्रमंडळीवर दुःखाचा डोंगर कोसळला आहे. येथील महात्मा फुले पुतळा परिसरातील रहिवासी संजय विठ्ठल महाजन यांचा मोठा मुलगा भावेश महाजन याचा विवाह २५ एप्रिलला होणार होता. मोठ्या मुलाचा विवाह असल्यामुळे संजय महाजन व त्यांच्या परिवारात आनंदाचे वातावरण होते. विवाहाची तयारी वेगाने सुरू होती. नातेवाईक, मित्रपरिवार आणि समाजबांधवांना लग्नपत्रिकावाटप झाल्या होत्या.

बुधवारी सकाळी नियोजित वर भावेश महाजन काका ज्ञानेश्वर महाजन यांच्या घरी गेला आणि ‘तुमची मोटारसायकल द्या, मी नाश्ता करायला जात आहे’, असे सांगून गेला होता. बराच वेळ झाल्यानंतरही भावेश मोटारसायकल घेऊन न आल्याने ज्ञानेश्वर महाजन यांनी भावेशाच्या घरी जाऊन चौकशी केली असता, तो अद्याप घरी आला नसल्याचे त्याच्या आई-वडिलांनी सांगितले. काही वेळानंतर भावेशचे भाऊ राकेश आणि मनोज यांनी ज्ञानेश्वर महाजन यांनी मोबाईल करून भावेश धरणगाव रस्त्यावरील सुनील पाटील यांच्या शेतातील विहिरीत पडला असून, त्याचा मृतदेह पाण्यावर तरंगत असल्याचे सांगितले. ज्ञानेश्वर महाजन नातेवाईक गजानन माळी यांच्यासह शेतात गेले. भावेश यास परिसरातील नागरिकांच्या सहकार्याने विहिरीबाहेर काढले आणि त्यास ग्रामीण रुग्णालयात नेले. तेथे तो मृत झाल्याचे वैद्यकीय अधिकाऱ्यांनी सांगितले. पाच दिवसांनंतर मोठ्या मुलाचा विवाह असल्यामुळे संजय महाजन आणि त्यांच्या परिवारातील सदस्य आनंदात होते. मात्र, नियतीने काही क्षणातच महाजन परिवाराचा आनंद हिसकावून घेतला आणि सर्व परिवाराला दुःखाच्या खाईत लोटून दिले. याबाबत ज्ञानेश्वर महाजन यांनी दिलेल्या माहितीवरून येथील पोलिसांत आकस्मिक मृत्यूची नोंद झाली असून, पोलिस निरीक्षक ज्ञानेश्वर जाधव तपास करीत आहेत.