एरंडोल ः शहरासह ग्रामीण भागात कोरोना रुग्णांच्या संख्येत वाढ होत असल्यामुळे प्रशासन,व्यापारी आणि व्यावसायिक यांनी संयुक्तरीत्या घेतलेल्या पाच दिवसीय जनता कर्फ्युस नागरिक आणि व्यावसायिकांनी उत्स्फूर्त प्रतिसाद दिला.जनता कर्फ्यूमुळे शहरातील सर्व व्यवसाय पूर्णपणे बंद होते तर प्रमुख रस्त्यांवर आणि बाजारपेठेत शुकशुकाट दिसून आला.

वाचा- कोविडची लक्षणे असलेल्या रुग्णांची तातडीने चाचणी करा
 

शहरात कोरोना रुग्णांच्या संख्येत वाढ होत असल्यामुळे कोरोनाची साखळी खंडित करण्याच्या दृष्टीने प्रांताधिकारी विनय गोसावी यांच्या अध्यक्षतेखाली तहसीलदार अर्चना खेतमाळीस,नगराध्यक्ष रमेश परदेशी,उपनगराध्यक्ष अभिजित पाटील,मुख्याधिकारी किरण देशमुख,पोलीस निरीक्षक ज्ञानेश्वर जाधव यांच्यासह शहरातील व्यापारी,व्यावसायिक आणि सामाजिक आणि राजकीय क्षेत्रातील पदाधिका-यांची बैठक पालिका सभागृहात आयोजित करण्यात आली होती.बैठकीत प्रांताधिकारी विनय गोसावी यांनी कोरोनाचा धोका वाढत असल्यामुळे पाच दिवस जनता कर्फ्यू लागू करण्याची सुचना केली असता सर्वांनी त्यास एकमुखाने पाठींबा दिला.बुधवार पासून रविवार पर्यंत जनता कर्फ्यू जाहीर करण्यात आला.जनता कर्फ्युस सर्व व्यापारी आणि नागरिकांनी उत्स्फूर्त पाठींबा दिला.जनता कर्फ्यूच्या पहिल्या दिवशी शहरातील सर्व व्यवहार शंभर टक्के बंद होते.प्रमुख बाजारपेठ आणि रस्त्यांवर शुकशुकाट होता.नागरिकांनी देखील जनता कार्फुस पाठींबा देऊन विनाकारण घराबाहेर फिरण्याचे टाळले.

पोलीसांची गस्त

पोलीस प्रशासन आणि पालिका कर्मचारी दिवसभर शहरात गस्त घालुन नागरिकांना घराबाहेर न पडण्याचे आवाहन करीत होते.कोरोनाची भीती आणि प्रशासनाच्या कठोर अंबलबजावणीमुळे बुधवारी रस्ते निर्मनुष्य झाले होते. प्रांताधिकारी विनय गोसावी,पोलीस निरीक्षक ज्ञानेश्वर जाधव व पालिका कर्मचा-यांनी शहरात पायी फिरून नागरिकाना जनता कर्फ्युस सहकार्य करण्याचे आवाहन केले होते.कोरोनाची साखळी खंडित करण्यासाठी व शहर कोरोनामुक्त करण्यासाठी नागरिकांनी शासकीय आदेशांचे पालन करून प्रशासनास सहकार्य करावे असे आवाहन प्रांताधिकारी विनय गोसावी,तहसीलदार अर्चना खेतमाळीस,नगराध्यक्ष रमेश परदेशी, मुख्याधिकारी किरण देशमुख,पोलीस निरीक्षक ज्ञानेश्वर जाधव यांनी केले आहे.
 

संपादन- भूषण श्रीखंडे