रावेर (जि. जळगाव) : शेतात नांगरणी करताना ट्रॅक्टर नाल्यात उलटून त्या खाली दबल्यामुळे एका पंधरा वर्षीय मुलाचा जागीच मृत्यू झाला. ही हृदयद्रावक घटना विश्राम जिन्सी (ता. रावेर) येथे रविवारी (ता. २९) घडली. याबाबत रावेर पोलिस ठाण्यात गुन्हा दाखल करण्यात आला आहे.

विश्राम जिन्सी येथील हरदास शंकर राठोड यांच्या गट क्रमांक १६ मधील शेतात रविवारी (ता. २९) दलसिंग ग्यारसिंग मिलाला (वय १५) (रा. मुसापुरी, ता. भगवानपुरा, मध्य प्रदेश) हा भरधाव ट्रॅक्टर चालवून नांगरणी करीत असताना शेताजवळील नाल्यात लाल रंगाचे महिंद्रा युवो ५७५ डीआय कंपनीचे ट्रॅक्टर उलटून यात चालक दलसिंग ग्यारसिंग मिलाला (वय १५) हा ट्रॅक्टरखाली दबला जाऊन काना-नाकातून रक्तस्त्राव होऊन गंभीर जखमी झाल्यामुळे जागीच ठार झाला. याबाबत शेतमालक हरदास राठोड यांनी रावेर पोलिस ठाण्यात दिलेल्या फिर्यादीवरून ट्रॅक्टर मालकाविरुद्ध गुन्हा दाखल करण्यात आला आहे. पोलिस उपनिरिक्षक विशाल सोनवणे तपास करीत आहेत.