जळगाव : जिल्‍हा कारागृहात बंदिवान असलेल्या रवींद्र ऊर्फ चिन्या जगताप हत्याकांडातील संशयित तुरूंग अधीक्षक पेट्रस गायकवाड याचा जामीन न्यायालयाने फेटाळला.

जामीन फेटाळल्याची खात्री झाल्यानंतर गायकवाड यांनी तडकाफडकी नगर जिल्‍हाही सोडल्याचे सांगण्यात येत आहे. (Chinya Jagtap murder case Court rejects suspects bail Jalgaon crime Latest marathi news)

तत्कालीन तुरूंग अधीक्षक पेट्रस गायकवाडसह जेल सर्कल जितेंद्र माळी आणि अन्य तीन कर्मचाऱ्यांनी केलेल्या अमानुष मारहाणीत ११ सप्टेंबर २०२० ला जळगाव जिल्हा कारागृहात बंदिवान चिन्या ऊर्फ रवींद्र जगताप याचा मृत्यू झाला होता.

त्यानंतर चिन्या जगतापची पत्नी मीना जगताप यांनी उच्च न्यायालयात दाद मागितल्यावर तत्कालीन जेलर पेट्रस गायकवाडसह पाच संशयितांविरोधात न्यायालयाच्या आदेशाने गुन्हा दाखल करण्यात आला.

अंतरिम अटकपूर्व जामीन मिळाल्यानंतर तत्कालीन तुरूंग अधीक्षक पेट्रस गायकवाड याची नगरच्या कारागृहात बदली झाली होती.

विशेष म्हणजे गुन्हा दाखल झाल्यानंतर कारागृह अधीक्षक पेट्रस गायकवाड याला अटक न झाल्याने कारागृह प्रशासन, वरिष्ठ अधिकारी आणि पोलिस दलाच्या भूमिकेवर संशय व्यक्त होत आहे. आता न्यायालयाने नियमित जामीन फेटाळल्याने पेट्रस गायकवाड यांनी नगरमधून धूम ठोकल्याचे समजते.