भुसावळ तालुक्यातील कंडारी गावात पूर्ववैमनस्यातून वखार परिसरातील ग्रामपंचायत शाळेजवळ शांताराम साळुंखे व राकेश साळुंखे या दोन भावांचा शुक्रवारी (ता. १) रात्री दहाच्या दरम्यान खून झाल्याची घटना घडल्याने परिसरात खळबळ उडाली आहे. या घटनेत दोन जण गंभीर जखमी आहेत.

या घटनेबाबत मिळालेली माहितीनुसार, रात्री 11 वाजण्याच्या सुमारास कंडारी परिसरात शांताराम भोलानाथ साळुंखे व राकेश भोलानाथ साळुंखे या दोन सख्ख्या भावांवर अज्ञातांनी चाकूने व तलवारीने वार केले. या घटनेमध्ये दोघांचा जागीच मृत्यू झाला आहे. तर हा प्रकार घडल्यानंतर काही तासाच्या आतच श्रीराम नगर परिसरात कुविख्यात गुन्हेगार निखिल राजपूत याच्यावर अज्ञातांनी वार केले. निखिल राजपूतच्या गळ्यावर वार करत त्याची हत्या करण्यात आली. या तिहेरी हत्याकांडाने भुसावळ शहर हादरलं असून भुसावळ शहर पोलीस व बाजारपेठ पोलिसांकडून मारेकऱ्यांचा शोध सुरू आहे.

घटनास्थळी तालुका पोलिस ठाण्याचे परिविक्षाधिन अधिकारी सतीष कुलकर्णी तसेच शहर पोलिस ठाण्याचे पोलिस निरीक्षक गजानन पडघन व कर्मचारी पोहचले असून, परिसरातील सीसीटीव्ही कॅमेरे तपासणी सुरू आहे. दरम्यान, या दुहेरी खुनामागील नेमके कारण अद्याप समजू शकले नसून, पोलिस तपास करीत आहे.

दरम्यान, भुसावळ शहरासह तालुक्यात खून, घरफोड्या यासारखे गंभीर गुन्ह्यांना आळा घालण्यास पोलिस असमर्थ ठरत असून, कायदा व सुव्यवस्थेचा प्रश्न पुन्हा एकदा ऐरणीवर आला आहे.