जळगाव : कर्जबाजारीपणाला कंटाळून तरुण शेतकऱ्याने गळफास घेत आत्महत्या केल्याची घटना सोमवारी (ता. १६) सायंकाळी घडली. प्रमोद भागवत पाटील (वय ३७, रा. आव्हाणे) असे मृत शेतकऱ्याचे नाव आहे. तालुका पोलिस ठाण्यात आकस्मिक मृत्यूची नोंद करण्यात आली आहे.

तरडी (ता.जि. धुळे) येथील मूळ रहिवासी प्रमोद पाटील पत्नी व मुलासह आव्हाणे (ता. जळगाव) गावात वास्तव्याला होते. लहानपणीच आई-वडिलांचे निधन झाल्याने ते आव्हाणे येथे मामाच्या गावाला राहायला आले. आपल्या थोड्याशा शेतीत काम करून कुटुंबाचा उदरनिर्वाह करत होते. अक्षयतृतीयेनिमित्त पत्नी आरती मुलगा मनीषसोबत माहेरी गेल्या असताना घरी एकट्याच असलेल्या प्रमोदने सोमवारी सायंकाळी पाचच्या पूर्वी गळफास घेतला. शेजाऱ्यांना हा प्रकार लक्षात आल्यावर ही घटना उघडकीस आली. मृतदेह उतरवून तातडीने जिल्हा शासकीय वैद्यकीय महाविद्यालयात दाखल करण्यात आला. वैद्यकीय अधिकाऱ्यांच्या पथकाने तपासणीअंती त्यांना मृत घोषित केले. कर्जबाजारीतून त्यांनी आत्महत्या केल्याचे आप्तस्वकीयांकडून सांगण्यात आले. सहाय्यक फौजदार अनिल फेगडे तपास करीत आहेत. त्यांच्या मागे मोठा भाऊ गजानन, पत्नी आरती आणि मुलगा मनीष असा परिवार आहे.