जळगाव : जिल्हाधिकारी कार्यालय, उपविभागीय कार्यालय व तहसील कार्यालयात दररोज विविध व्यक्ती, राजकीय संघटना, अराजकीय संघटना, मोर्चा काढून निवेदन देण्यास येत असतात. (District Magistrates Guidelines announced for marchers jalgaon news)

तथापि, निवेदन देण्यासाठी विविध संघटनांचे पदाधिकारी कार्यालयात येऊन मोठमोठ्याने घोषणाबाजी करून जिल्हाधिकारी कार्यालय, उपविभागीय कार्यालय व तहसील कार्यालयातील शांतता भंग करण्याचा प्रयत्न करतात. त्या अनुषंगाने जिल्हा दंडाधिकारी अमन मित्तल यांनी एक परिपत्रक काढले असून, त्याद्वारे निवेदन देण्याबाबत मार्गदर्शक सूचना जाहीर केल्या आहेत.

या अनुषंगाने संबंधित सर्व पोलिस ठाण्याच्या निरीक्षकांना सूचना निर्गमित केल्या आहेत, त्या अशा : विविध व्यक्ती, राजकीय संघटना, अराजकीय संघटना, समूह यांनी निवेदन देण्याबाबत संबंधित पोलिस ठाण्यात परवानगी मागण्याचा अर्ज दिल्यानंतर संबंधित पोलिस निरीक्षकांनी ज्या विभागास, कार्यालयास निवेदन देण्यात येणार आहे,

हेही वाचा : देशातले ३२ म्युच्युअल फंडांचं व्यवस्थापन आहे महिलांच्या हाती...

त्या विभागाचे, कार्यालयप्रमुखांना किमान एक दिवस आधी कळविणे आवश्यक आहे. निवेदन देताना मोर्चात सहभागी होणाऱ्या व्यक्तींची संख्या लक्षात घेऊन त्या विभागात, कार्यालयात पुरेसा पोलिस बंदोबस्त पुरविण्याची दक्षता घ्यावी, मोर्चामधील केवळ ५ व्यक्तींना निवेदन देण्याची मुभा राहील.

...तर गुन्हा दाखल होणार

मोर्चा काढून निवेदन देताना शासकीय कार्यालयात शांतता ठेवणे आवश्यक राहील. कार्यालयातील कर्मचाऱ्यांना, कार्यालयात उपस्थित नागरिकांना घोषणाबाजीमुळे त्रास होणार नाही, याबाबत संबंधितांना पूर्व सूचना देण्यात यावी. नियमांचे उल्लंघन करणाऱ्या व्यक्ती, संघटना यांच्यावर नियमानुसार कार्यवाही करण्यात यावी.