जळगाव - चोकअप साफ करण्यासाठी सफाई कामगाराला थेट गटारात उतरविल्याचा प्रकार ‘सकाळ’ने बुधवारी बातमीच्या रूपातून समोर आणल्यानंतर महापालिका प्रशासन खडबडून जागे झाले. आयुक्त विद्या गायकवाड यांनी या गंभीर प्रकाराची दखल घेत आरोग्याधिकारी व आरोग्य निरीक्षकाकडून त्यासंबंधी चौकशी करून माहिती मागविली आहे.

सेप्टिक टँक, मैला अथवा गटार साफ करण्यासंदर्भात सर्वोच्च न्यायालयाच्या निर्देशावरून केंद्र सरकारने कठोर कायदे केले आहेत. या ठिकाणांची स्वच्छता यंत्राद्वारे करणे बंधनकारक असताना, अनेक ठिकाणी सफाई कामगारांना त्यात उतरवून स्वच्छता केली जात असल्याचे प्रकार समोर येत असतात. असाच प्रकार जळगावातील बळीरामपेठेत नुकताच घडला. गटाराचे चेंबर चोकअप झाल्यानंतर त्याठिकाणी कामगाराला उतरवून ते साफ करण्यात आले. त्याबाबत ‘सकाळ’ने बुधवार (ता. १)च्या अंकात ठळकपणे वृत्त प्रकाशित केल्यानंतर सर्वत्र खळबळ उडाली.

आयुक्तांकडून दखल

या वृत्ताची दखल घेत महापालिका आयुक्त डॉ. विद्या गायकवाड यांनी या प्रकाराच्या चौकशीचे आदेश दिले. त्यांनी सकाळीच संबंधित भागातील आरोग्य निरीक्षकाला याबाबत जाब विचारला, तसेच आरोग्याधिकाऱ्यांनाही प्रकरणाची माहिती घेऊन अहवाल सादर करण्याच्या सूचना दिल्या आहेत.

मनाई करूनही कामगारांची ‘ना’

गटारीत उतरवून स्वच्छता करण्याबाबत अनेकदा सफाई कामगारांना मनाई केली जाते. हातात ग्लोव्हज, पायात बूट व किट घालून सफाई करण्यासंबंधी सूचना केली जाते. मात्र, कामगार हे साहित्य घालून स्वच्छता करण्याचे टाळतात, असाही अनुभव आहे.

गटारीत उतरवून स्वच्छता करण्याच्या प्रकाराचे वृत्त वाचले. यासंबंधी आरोग्य निरीक्षकाकडून माहिती घेण्यात येत आहे. सर्वोच्च न्यायालयाचे निर्देश व सरकारच्या परिपत्रकाचा अभ्यास करण्यात येत असून, यासंदर्भात योग्य ती कारवाई केली जाईल.

- विद्या गायकवाड, आयुक्त, महापालिका.