जळगाव : राज्याचे नेते असलेले मंत्री गिरीश महाजन (Girish Mahajan) यांना त्यांचे सासर असलेली पळसखेडा बुद्रुकची ग्रामपंचायतही राखता आली नाही. त्यात राष्ट्रवादीने आपला झेंडा फडकविला आहे, असा टोला राष्ट्रवादीचे नेते, आमदार एकनाथ खडसे (Eknath Khadse) यांनी सोमवारी (ता. ९) पत्रकारांशी बोलताना लगावला.

हेही वाचा: योग्य वेळेतच करा इच्छापत्र आणि व्हा चिंतामुक्त

जिल्ह्यात झालेल्या ग्रामपंचायतीच्या निवडणूक निकालाबाबत प्रथमच खडसेंनी भाष्य केले. सर्वच ठिकाणी पैसा फेकून मतं विकत घेता येत नाही, अशी टीका भाजपवर निशाणा साधताना केली. याबाबत बोलताना खडसे म्हणाले, की राज्याचे नेते व पॉवरफुल मंत्री गिरीश महाजन यांना त्यांचे सासर असलेल्या पळसखेड्यातही यश आले नाही.

चाळीसगाव येथील राष्ट्रीय विद्यालय संस्थेच्या निवडणुकीत मोठ्या प्रमाणात आर्थिक व्यवहार झाल्याची चर्चा आहे. एवढे होऊनही आमदार मंगेश चव्हाण यांच्या पॅनलचा मोठा पराभव झाल्याचे ते म्हणाले.

जिल्ह्यातील प्रकल्प कधी पूर्ण होणार?

जळगाव जिल्ह्यासह खानदेशात अनेक प्रकल्प रखडले आहेत. या प्रकल्पांविषयी माझ्याशिवाय जिल्ह्यातील एकाही आमदाराने विधानसभेत प्रश्‍न उपस्थित केले नाही.

सिंचन प्रकल्प पूर्ण झाले पाहिजेत, यासाठी आपली सुरवातीपासूनची तळमळ राहिली आहे. मात्र, एकही लोकप्रतिनिधीविषयी बोलत नसून त्यांनी चुप्पी साधलीय. लोकप्रतिनिधी बोललेच नाही, तर हे प्रकल्प पूर्ण कधी होणार, असा प्रश्‍नही त्यांनी उपस्थित केला.