अमळनेर (जि. जळगाव) : शेती पंपासाठी असलेल्या दोन रोहित्रांमधून ऑइल व विजेचे तीन खांब असे २२ हजार ५०० रुपयांचे साहित्य चोरट्याने चोरून नेल्याची घटना एकलहरे शिवारात लवखी नाल्याजवळ ७ मे रोजी घडली.

महावितरणच्या एकलहरे येथील गावठाण जागेत शेतीपंपासाठी लावलेल्या दोन रोहित्रातून साडेसात हजार रुपये किमतीचे ३०० लिटर ऑइल आणि १५ हजार रुपये किमतीची लघुविद्युत दाबाचे तीन लोखंडी खांब असे साडेबावीस हजाराचे साहित्य चोरीस गेल्याचे वरिष्ठ तंत्रज्ञ प्रमोद पाटील यांच्या लक्षात आले. त्यांनी कळमसरे कक्ष कार्यालयाचे कनिष्ठ अभियंता किशोर सुर्वे यांना कळवले त्यांनी प्रत्यक्ष पाहणी करून मारवड पोलिस स्टेशनला फिर्याद दिल्यावरून गुन्हा दाखल झाला.