जळगाव : तालुक्यातील किनोद येथे बसस्थानकावरील यशपाल हॉटेलमध्ये राज्य उत्पादन शुल्क विभागाच्या पथकाने छापा टाकला. त्यात ६६ हजार १३० रुपये किमतीच्या बनावट देशी, विदेशी दारुच्या ९३८ बाटल्या आढळून आल्या.

याप्रकरणी एकाला अटक करण्यात आली असून न्यायालयाने पोलिस कोठडी दिली आहे. अशोक भिला सोनवणे (वय ४२, रा.चांदसर, ता.धरणगाव ह.मु.कांचननगर, जळगाव) असे अटक केलेल्या संशयित आरोपीचे नाव आहे. (Fake liquor seized in Kinod Strike action of State Production Department Jalgaon latest marathi news)

जळगाव तालुक्यातील किनोद येथे बसस्थानकावरील यशपाल हॉटेलमध्ये बनावट मद्याची विक्री केली जात असल्याची गुप्त माहिती राज्य उत्पादन शुल्क विभागाच्या पथकाला मिळाली होती. त्यानुसार पथकाने मंगळवारी २३ ऑगस्ट रोजी रात्री उशीरा या हॉटेलवर छापा मारला असता देशी व विदेशी मद्याच्या ९३८ बाटल्या मिळून आल्या.

ही दारु बनावट असल्याचे निष्पन्न झाले. विभागीय उपायुक्त अर्जुन ओहोळ व अधीक्षक जितेंद्र गोगावले यांच्या मार्गदर्शनाखाली भरारी पथकाचे निरीक्षक सी. एच. पाटील, दुय्यम निरीक्षक ए. एस. पाटील, एस. आर. शेलार, एस. बी. भगत, सतीश पाटील यांच्यासह पोलिस नाईक एन. व्ही. पाटील, ए. व्ही. गावंडे, एम. डी. पाटील, के. पी. सोनवणे यांच्या पथकाने ही कारवाई केली.