जळगाव : पाथरी (ता. जळगाव) येथील ६५ वर्षीय वृद्धाने राहत्या घरात गळफास घेत आत्महत्या केल्याची घटना दुपारी उघडकीला आली आहे. याबाबत एमआयडीसी पोलिस ठाण्यात अकस्मात मृत्यूची नोंद करण्यात आली आहे. सखाराम बुधा धनगर (वय ६५, रा. पाथरी, ता. जि. जळगाव) असे मृत वृद्धाचे नाव आहे. (Latest Marathi News)

पोलिसांनी दिलेल्या माहितीनुसार, ६५ वर्षीय सखाराम धनगर पत्नी, मुलगा व सून अशा कुटुंबीयांसह पाथरी येथे वास्तव्याला होते. शेती काम करून आपला उदरनिर्वाह करत होते. गेल्या काही दिवसांपासून तणावात होते. शेतातील सततची नापिकी आणि आजारपणामुळे ते विवंचनेत होते. सोमवारी (ता. १) मुलगा, सून व पत्नी हे सर्व शेतात कामासाठी निघून गेले. त्यावेळी सखारा धनगर हे घरात एकटेच होते. दुपारी त्यांनी राहत्या घरात गळफास घेऊन आत्महत्या केली.

घरातील कुटुंब दुपारी घरी आले तेव्हा त्यांनी गळफास घेतल्याचे निदर्शनास आले. त्यांनी तातडीने खाली उतरवून जिल्हा शासकीय वैद्यकीय महाविद्यालयात दाखल केले असता वैद्यकीय अधिकारी यांनी मयत घोषित केले. याबाबत एमआयडीसी पोलिस ठाण्यात अकस्मात मृत्यूची नोंद करण्यात आली आहे. त्यांच्या पश्चात पत्नी बेबाबाई, मुलगा गोविंदा, सून ज्योती, नातवंडे आणि दोन भाऊ असा परिवार आहे.