पारोळा : चोरवड (ता. पारोळा) येथील एका शेतकऱ्याने कर्जाला कंटाळून काहीतरी विषारी औषध सेवन करून आत्महत्या केली. (farmer commits suicide by poison at Chorwad)

चोरवड येथील सुनील विठ्ठल पाटील यांनी पारोळा पोलिसात माहिती दिली, की वडील विठ्ठल वीरभान पाटील (६५) हे १८ जूनला दुपारी अडीचच्या सुमारास नेहमीप्रमाणे घराचे कामकाज आटोपून काहीएक न सांगता शेतात निघून गेले. काही वेळानंतर मी कर्जाला कंटाळून विषारी पदार्थाचे सेवन केले आहे, असा घरी फोन आल्यानंतर नीळकंठ पाटील, समाधान पाटील हे रवाना झाले. शेतात जाऊन बघितले असता विठ्ठल पाटील यांच्या नाका-तोंडातून विषारी पदार्थ सेवन केल्याने फेस व वास येत होता. त्यानंतर आम्ही त्यांना खासगी वाहनाने कुटीर रुग्णालय पारोळा येथे घेऊन आलो. पुढील उपचारार्थ जळगाव येथे हलविले असता रविवारी (ता. २६) त्यांचा उपचारादरम्यान मृत्यू झाला. या प्रकरणी पारोळा पोलिसात अकस्मात मृत्यूची नोंद करण्यात आली आहे.