जळगाव : दिवाळीला अवघे काही दिवस शिल्लक असल्याने फटाका व्यवसाय तेजीत आला आहे. याचा गैरफायदा घेत जळगाव शहरातील पोलन पेठेतील एका फटाका होलसेलरचे दुकान फोडून चेारट्यांनी अडीच लाख रुपयांची चोरी झाल्याप्रकरणी शहर पोलिस ठाण्यात गुन्हा दाखल झाला आहे.

पोलन पेठ परिसरात बोहरा मशिदीसमोर शब्बीर अमरेलीवाला यांचे महाराष्ट्र फटाका दुकान आहे. दिवाळी सणाला अवघे काहीच दिवस शिल्लक असल्याने मालाची आवक आणि ऑर्डरचे काम सुरू आहे. त्यात दसऱ्याच्या दिवशी आलेली रक्कम शब्बीर अमरेलीवाला नेहमीप्रमाणे काउंटरच्या ड्रॉव्हरमध्ये ठेवून दुकान बंद करून निघून गेले.(Firecracker shopkeepers shop theft two and half Lakh Jalgaon News)

दुसऱ्या दिवशी गुरुवारी दुकानावर काम करणारी तरुणी योगिता चौधरी तसेच दुकानमालकांचे वडील इलियास अमरेलीवाला दुकानावर पोचल्यानंतर ड्रॉव्हर तोडलेल्या अवस्थेत आढळले.

कुणीतरी चोरट्याने दुकानाचे ड्रॉव्हर तोडून आतील दोन लाख ५४ हजार रुपयांची रोकड असलेली बॅग आणि कागदपत्रे असलेली दुसरी पिशवी हे साहित्य चोरीस गेल्याचे निदर्शनास आले. या प्रकरणी शब्बीर अमरेलीवाला यांनी दिलेल्या तक्रारीवरून शहर पोलिस ठाण्यात चोरीचा गुन्हा दाखल झाला असून, सहाय्यक फौजदार विजय निकुंभ तपास करीत आहेत.