Jalgaon News : भारतीय जनता पक्ष महाराष्ट्र प्रदेशच्या सर्व २८८ विधानसभा मतदारसंघांच्या निवडणूक प्रमुखांच्या नियुक्त्या प्रदेशाध्यक्ष चंद्रशेखर बावनकुळे यांनी नुकत्याच जाहीर केल्या असून, यात अमळनेर विधानसभा मतदारसंघात निवडणूक प्रमुख म्हणून भाजप प्रदेश उपाध्यक्ष माजी आमदार स्मिता वाघ यांची नियुक्ती करण्यात आली आहे.

नियुक्तीबाबतचे पत्र भाजप प्रदेश कार्यालयाकडून ८ जूनलाच प्रसिद्ध झाले आहे. ज्या मतदारसंघात भाजपचे आमदार असतील तेथे आमदारांना तर जेथे आमदार नसतील तेथे माजी आमदार किंवा प्रमुख पदाधिकाऱ्यांना नियुक्त करण्यात आले आहे. (Former MLA Smita Vaghaver Assembly election responsibility Jalgaon News)

हेही वाचा : Credit Card फसवणूक....काय घ्याल काळजी?

या नियुक्त्या लक्षात घेता भाजपने आतापासूनच निवडणुकीची तयारी सुरू केल्याचे स्पष्ट झाले आहे.

स्मिता वाघ यांनी आतापर्यंत लोकप्रतिनिधी म्हणून उत्तम कामगिरी बजावली असून, सोबतच जिल्हा पातळीपासून प्रदेश पातळीपर्यंत अनेक संघटनात्मक जबाबदाऱ्या त्यांनी काळजीने सांभाळल्या आहेत.

सद्यःस्थितीत भाजप प्रदेश उपाध्यक्ष म्हणून जबाबदारी त्यांच्यावर असताना पक्षाने त्यांच्यावर अमळनेर विधानसभा मतदारसंघात निवडणूक प्रमुख म्हणून दुसरी मोठी जबाबदारी दिली आहे. या नियुक्तीबद्दल त्यांचे भाजप नेते तसेच जिल्हा व तालुका पदाधिकारी व कार्यकर्त्यांनी अभिनंदन केले आहे.