जळगाव : शहरातील एका महिलेची क्रॅश कूपनचे आमिष दाखवून ९२ हजारांत, तर एका शिक्षकाची क्रेडिट कार्डद्वारे एक लाखांत फसवणूक केल्याच्या दोन घटना समोर आल्या आहेत. ऑनलाइन फसवणुकीच्या वाढत्या प्रकारांमुळे पोलिसांसमोर आव्हान उभे आहे.पहिल्या घटनेत भगीरथ कॉलनीतील महिलेची ९२ हजारांत ऑनलाईन फसवणूक झाली. शीतल राजेश काबरा (वय ४२) जळगाव शहरातील खासगी हॉस्पिटलमध्ये मॅनेजर म्हणून नोकरीस आहेत.

बुधवारी (ता. २) शीतल काबरा घरी असताना, त्यांच्या घरी रजिस्टर पोस्टाने एक बंद पाकीट आले. त्यात नापतोल कंपनीचे पत्र क्रॅश कूपन कार्ड होते. कूपन कार्ड क्रॅश केले असता, त्यात इंग्रजीतून साडेसहा लाख जिंकल्याचा व ते मिळविण्यासाठी १९ RuB असा एसएमएस कोड होता. क्रॅश कार्डनुसार रक्कम मिळण्यासाठी शीतल काबरा यांनी पत्रावरील हेल्पलाइन नंबरवर संपर्क साधला. हेल्पलाइन नंबरवर बोलणाऱ्या व्यक्तीने विविध प्रकारचे टॅक्स सांगून काबरा यांना ‘गूगल पे’ने रक्कम पाठविण्यास सांगितले. त्यानुसार त्यांनी एकूण ९२ हजार रुपये पाठविले. मात्र, क्रॅश कार्डनुसार कुठलीही रक्कम मिळाली नाही. फसवणूक झाल्याची खात्री झाल्यावर शीतल काबरा यांनी जिल्हापेठ पोलिसांत तक्रार दिली. हवालदार जयंत कुमावत तपास करीत आहेत.

दरम्यान, दुसऱ्या घटनेत उर्दू शाळेतील शिक्षक व भवानीपेठेतील रहिवासी फरहा शेख अमिनोद्दीन (वय ३९) वडील व मुलीसह वास्तव्याला आहेत. त्यांच्याकडे आयसीआयसीआय बँकेचे क्रेडिट कार्ड असून, त्यांनी अद्यापपर्यंत क्रेडिट कार्डचा वापर केलेला नाही. १७ जानेवारीस क्रेडिट कार्डच्या कस्टमर केअरमधून फोन आला व तुम्ही घेतलेल्या एक लाख १९ हजार रुपयांचे कर्जाचे दोन हप्ते थकीत आहेत. ते लवकरात लवकर भरा, असे सांगण्यात आले. त्यांनी कुठलही कर्ज घेतलेले नसल्याने त्यांनी बँकेत धाव घेऊन चौकशी केली असता, दोन ठिकाणी कर्ज घेतल्याचे दिसून आले. यात फसवणूक झाल्याचे लक्षात आल्यानंतर त्यांनी गुरुवारी (ता. ३) शनिपेठ पोलिस ठाण्यात तक्रार दिली. त्यावरून गुन्हा दाखल झाला आहे. पोलिस उपनिरीक्षक यशोदा कणसे तपास करीत आहेत.