पाचोरा (जि. जळगाव) : अलीकडच्या स्वार्थी व स्वयंकेंद्री युगात माणुसकी व प्रामाणिकपणा लोप पावत असल्याचा आरोपात्मक सूर समाज मनातून व्यक्त होत असल्याचे आपण पाहतो. परंतु अजूनही समाजात प्रामाणिकपणा शिल्लक आहे, याची प्रचिती देखील विविध घटनांवरून येते. (Harishchandra Tawde returned 10 thousand rupees received on phonepe to concerned person jalgaon news)

कळमसरा (ता. पाचोरा) येथील हरिश्चंद्र दत्तात्रय तावडे यांनी देखील आपला प्रामाणिकपणा कायम राखत ‘फोन पे’वर आलेले दहा हजार रुपये संबंधित व्यक्तीस परत केले. त्यांच्या या प्रामाणिकपणाचे कौतुक होत आहे.

हरिश्चंद्र तावडे यांना ‘फोन पे’वर दहा हजार रुपये जमा झाल्याचा मेसेज आल्यानंतर ते आश्चर्यचकित झाले. कोणीही कोणत्याही कारणाने आपल्या ‘फोन पे’द्वारे पैसा पाठवणार नसल्याचे त्यांना ठाऊक असल्याने त्यांनी कोणाच्या ‘फोन पे’वरून ही रक्कम आली. त्याचा शोध घेतला व पैसे पाठवणाऱ्यांशी संपर्क केला.

हेही वाचा : जीएसटीसाठी नोंदणी केलीच नाही तर??

कुणाल पवार (रा. टाकळी, ता. चाळीसगाव) यांनी पैसे पाठवल्याचे सिद्ध झाल्यावर त्यांनी त्याबाबत विचारणा केली असता श्री. पवार यांना दुसऱ्या क्रमांकावर पैसे पाठवायचे होते परंतु मोबाईल क्रमांक डायल करताना एक क्रमांक चुकीचा डायल झाल्याने ते पैसे श्री. तावडे यांच्या मोबाईलवर जमा झाल्याचे स्पष्ट झाले. श्री. तावडे यांनी सदर व्यक्ती तीच असल्याची खात्री करून त्यांच्याच मोबाईल क्रमांकावर ‘फोन पे’द्वारे दहा हजार रुपये परत पाठवले. त्यांच्या प्रामाणिक वृत्तीचे कौतुक होत आहे.