Jalgaon Unseasonal Rain : शहरासह जिल्ह्यात रविवारी (ता. २६) सकाळपासूनच ढगाळ, धुकेयुक्त वातावरण होते. सकाळपासूनच वातावरणात गारठा जाणवत असल्याने अनेकांनी स्वेटर, मफलर परिधान केले होते.

गारठ्यामुळे ज्येष्ठांना अंगदुखी, हातपाय दुखीचा त्रास सुरू झाला आहे. (Heavy rain forecast today in district jalgaon unseasonal rain news )

सायंकाळी भुसावळ व जळगावमध्ये मध्यम स्वरूपात पावसाने हजेरी लावली. शहरात सायंकाळी सव्वासहाच्या सुमारास पावसास सुरवात झाली. रात्री उशिरापर्यंत पावसाची रिपरिप सुरू हेाती. दरम्यान, सोमवारी (ता. २७) जिल्ह्यात मध्यम ते जोरदार पावसाची शक्यता हवामान विभागाने वर्तविली आहे.

जिल्ह्यात २४ ते २८ नोव्हेंबरदरम्यान बेमोसमी पावसाचा अंदाज हवामान विभागाने वर्तविला होता. रविवारी सकाळी काही मिनिटांपुरते सूर्यदर्शन झाले. नंतर दिवसभर ढगाळ वातावरण व हुडहुडी कायम राहिली.

रविवारी रात्री आठनंतर विविध ठिकाणी मध्यम ते जोरदार पावसाची शक्यता वर्तविली आहे. ३० ते ४५ मिलिमीटर पावसाची शक्यता वर्तविण्यात आली. सोमवारी सायंकाळपर्यंत विविध ठिकाणी पावसाची शक्यता आहे.

२८ नोव्हेंबर ते ३ डिसेंबरदरम्यान जिल्ह्यात ढगाळ वातावरणाची शक्यता असल्याची माहिती हवामान अभ्यासक नीलेश गोरे यांनी दिली.