जळगाव : वरणगाव येथील ऑर्डनन्स फॅक्टरीत वादळी पावसात (Stormy Rains) निलगिरीच्या झाडांच्या फांद्या तुटल्या. त्यात वादळी पावसाचा मारा बसून शेकडो पोपट (Parrots) जखमी झाले. तर तितकेच मृत्युमुखी पडले. याची माहिती वन्यजीव संरक्षण संस्थेचे सर्पमित्र निशांत रामटेके यांना मिळाली. त्यांनी संस्थेच्या सहकाऱ्यांसह घटनास्थळी धाव घेत सुमारे ३५० पोपटांचा जीव वाचवला. (Hundreds of parrots rescued in Monsoon storm Jalgaon News)

अचानक आलेल्या वादळी पावसाच्या माऱ्याने ओले होऊन पाऊस पडावा तसे एक एक करत शेकडो पोपट झाडावरून पडू लागले. नागरिकांच्या लक्षात येताच त्यांनी वन्यजीव संरक्षण संस्थेच्या कार्यकर्त्यांसोबत संपर्क साधला. संस्थेचे सर्पमित्र रामटेके यांनी घटनास्थळ गाठले. शेकडो पोपट मृत्युमुखी पडले होते, तितकेच जखमी ओले होऊन विव्हळत पडले होते. सर्पमित्र स्वप्नील सुरवाडे, भूषण कोळी, लखन लोहारे, अक्षय तेली, मनीष कोळी, सागर कोळी, राहुल कोळी, हर्षल कोळी, प्रतीक मेढे, धीरज सुरवाडे, आकाश सोनार, अनिकेत वांकेडे, कुणाल गुरचड, ललित, लखन रांसिंगे, मनोज अंबोडे, राहुल खरात, ओम शिंदे आदी सहकाऱ्यांनी तातडीने पोपटांना सुरक्षित स्थळी हलविण्यास सुरवात केली. सोबत दोन पिंजरे होते.

त्यात काही पक्षांना ठेवले. परिसरातील एका रूममध्ये पोपटांना एकांतात सोडून खिडकी, दार उघडे ठेवण्यात आली. बाहेरून मांजर किंवा कुत्रा आत येणार नाही याची काळजी घेण्यात आली. तासाभरात ट्रेस कमी झाल्याने पोपटांत धीर आला. सुमारे ३० ते ४० पोपटांनी आकाशात भरारी घेतली.उर्वरित पोपटांना रात्री त्याच रूममध्ये ठेवण्याचा निर्णय घेतला. वन विभागास माहिती देऊन पक्ष्यांना सकाळी लवकर सोडण्याबाबत चर्चा झाली.

सुरक्षित स्थळी जाऊन पिंजरे उघडताच सर्व पोपट एक एक करत आकाशात भरारी घेत होते. ते बघून वन्यजीव संरक्षण संस्था आणि वन कर्मचारी बांधवांनी आनंद व्यक्त केला.