जळगाव : ग्रामीण भागात जेथे लोकसंख्या १५०० पेक्षा कमी आहेत, तेथील दारू (Alcohol) दुकाने अद्याप बंद आहेत. ती लवकरात लवकर सुरु करण्यात यावी जेणेकरून शासनाच्या महसूलमध्ये वाढ होऊन अवैध विक्रीला आळा बसेल, यासह विविध मागण्या जळगाव डिस्ट्रिक्ट वाईन मर्चंट असोसिएशनने उपमुख्यमंत्री अजित पवार(Deputy Chief Minister Ajit Pawar) यांच्याकडे शुक्रवारी (ता. १७) निवेदन देवून केली आहे.

अध्यक्ष अॅड. रोहन बाहेती, सचिव पंकज जंगले, ग्रामीणचे अध्यक्ष राजेंद्र चौधरी, माजी अध्यक्ष सुनिल भंगाळे यांनी मंत्री पवार यांच्याशी चर्चा केली. त्यावेळी पालकमंत्री गुलाबराव पाटील, माजी मंत्री एकनाथ खडसे यांच्यासोबत लवकरच याबाबत बैठक घेत सकारात्मक निर्णय घेवू असे आश्‍वासन मंत्री पवार यांनी दिले.

मद्यविक्रीच्या व्यवसायात मार्जिन कमी होत असून शासनाकडून रिटेल मार्जिन वाढवून मिळावे, फक्त ७ टक्‍के मार्जिन मिळत आहे ते १२ टक्के करून मिळावे. कारण व्यवसाय कमी असल्यामुळे नफा कमी असतो. मद्य विक्री करणाऱ्यांना गुन्हेगारी प्रवृतीचे नागरिक मारहाण करतात. त्यांचा बंदोबस्त व्हावा, अशी मागणी करण्यात आली.