जळगाव : जमिनीची सुपीकता आणि मर्यादा पाहता उच्च कृषी तंत्रज्ञानाचा उपयोग करून स्मार्ट पद्धतीने शेती करणे भविष्यात खूप महत्त्वाचे ठरेल. भविष्यात शेतीशिवाय सर्वांगीण प्रगती करणे केवळ अशक्य आहे, असा सूर फालीमधील विद्यार्थ्यांशी सुसंवाद साधताना शेतकऱ्यांमध्ये उमटला.

जैन हिल्स येथे फालीचे आठव्या संमेलनाच्या पहिल्या टप्प्याची सुरवात झाली. आघाडीच्या प्रगतिशील शेतकऱ्यांशी फालीच्या विद्यार्थ्यांनी जैन हिल्सच्या आकाश मैदानावर सुसंवाद साधला.

या शेतकऱ्यांचा समावेश

यात उमाळे येथील उमेश खडसे, पिंपळगावचे भागवत भाऊराव पाटील, पहूरचे शैलेश कृष्णा पाटील, नायगावचे विशाल किशोर महाजन, अटवाड्याचे विशाल अग्रवाल या शेतकऱ्यांचा समावेश होता. पहूरचे शैलेश पाटील यांनी आपल्या शेती अनुभव कौशल्याचे भंडार विद्यार्थ्यांनसमोर खुले केले. विशाल अग्रवाल यांनी जैन इरिगेशनच्या उच्च कृषी तंत्रज्ञानाचा वापर करून केळी, हळद, भगवा डाळिंब टिश्यूकल्चर, अतिसघन आंबा लागवड, जैन स्वीट आॕरेंज, असे फलोत्पादन, पांढरा कांदा, कापूस, आले, सोयाबीन, तूर, करार शेती याबाबत अनुभव सांगितले. उमाळे येथील उमेश खडसे यांनी टरबुजाचे उत्पादनात ठिबक व तंत्रज्ञानाचा वापराच्या फायद्याबाबत सांगितले. आॕटोमेशनामुळे होणारी पाण्याची बचतीवर विशाल महाजन यांनी संबोधले. फालीच्या काही विद्यार्थ्यांनी शेतकऱ्यांशी प्रश्नोत्तर स्वरूपात संवाद साधला. रोहिणी घाडगे यांनी सूत्रसंचालन केले.

१, २ तसेच ४ व ५ जूनला होणाऱ्या या संमेलनासाठी महाराष्ट्र व गुजरात राज्यातील १३५ शाळांमधील ११ हजार विद्यार्थ्यांमधून ८०० विद्यार्थ्यांची निवड झाली आहे. त्यापैकी ‘फाली’च्या पहिल्या टप्प्यातील संम्मेलनासाठी महाराष्ट्रातील ६७ शाळांमधील ४०० विद्यार्थी व ४० ए ई. (ॲग्रीकल्चर एज्युकेटर) यांनी सहभाग घेतला.

आस्थापनांसह गांधीतीर्थला भेट

विद्यार्थ्यांनी कंपनीच्या कृषिसंबंधीत विविध प्रकल्पांना भेटी दिल्या. कृषितज्ज्ञांशी संवाद साधला. भविष्यातील शेतीविषयी जाणून घेतले. दिवसभरात विद्यार्थ्यांनी गांधीतीर्थसह अत्याधुनिक पद्धतीने फळबागेची लागवड कशी केली जाते, याबाबत माहिती घेतली.