Jalgaon Crime News : येथून जवळ असलेल्या आयुध निर्माणी वसाहतीच्या हद्दीला लागून दर्यापूर शिवारातील गणेशनगरला किरकोळ वादातून ५५ वर्षीय पुरुषाचा खून करण्यात आला. रविवारी (ता.१५) सकाळी साडेनऊला ही घटना घडली. (Isma murder in Varangaon due to dispute jalgaon crime news)

याप्रकरणी वरणगाव पोलिसांनी अवघ्या एका तासात खुनातील संशयितास अटक केली. प्रमोद ज्ञानेश्‍वर महाजन (वय ५५) असे मृत व्यक्तीचे नाव आहे.

वरणगाव (ता. भुसावळ) येथील आयुध निर्माणी वसाहतमधील बसस्थानक परिसराला लागून आयुध निर्माणीतील सेवानिवृत्त कर्मचाऱ्यांची दर्यापूर शिवारात गणेशनगर नावाची वस्ती आहे. नातेवाईक यांना भेटण्यासाठी आलेले प्रमोद ज्ञानेश्वर महाजन (वय ५५) हे येथील एका चहा, नाष्ट्याच्या हॉटेलमध्ये थांबले.

यावेळी श्री. महाजन यांचा मित्र दीपक कृष्णकुमार सिंग त्यांना भेटला. दोघांनी हॉटेलमध्ये गप्पा मारत चहा घेतला. याचवेळी या दोघांमध्ये वाद सुरु झाला. याच वादातून दोघांमध्ये हाणामारी झाली. यावेळी दीपक सिंग याने प्रमोद महाजन याच्या डोक्यात लाकडी दांडके मारत निघून गेले.

लाकडी दांडक्याचा वर्मी मार लागल्याने प्रमोद महाजन हे जमिनीवर कोसळले घटनेची माहिती मिळताच पोलिस दाखल झाले. त्यांनी जखमी श्री. महाजन यांना रुग्णालयात दाखल केले असता डॉ. राजरत्न तायडे यांनी श्री. महाजन यांना तपासून मयत घोषित केले.

याप्रकरणी मनोहर ओंकार महाजन यांच्या तक्रारीवरून दीपक सिंग याच्याविरुद्ध खुनाचा गुन्हा दाखल करण्यात आला. पोलिसांनी मोबाईल लोकेशनवरुन संशयितास एका तासात अटक केली.