चोपडा : साक्री तालुक्यातील निजामपूर येथील वाणी कुटुंबातील तीन जण यावल तालुक्यातील मनुदेवी येथे दर्शनासाठी जात असतांना मजरेहोळ फाट्याजवळ समोरून येणाऱ्या बस आणि कारचा अपघात होवून कारमधील तीन जण जागीच ठार झाले. तर कारचा चालक गंभीर जखमी झाला आहे. निजामपूर येथील वाणी कुटुंबाकडून यावल तालुक्यातील मनुदेवी या तीर्थक्षेत्राला दरवर्षी भंडारा असतो. (accident near Chopda Major cracks death of three people from Nizampur )

त्यासाठी मंगळवारी (ता.८) हा भंडारा देण्यासाठी शैलेश श्रीधर वाणी (वय ३४) निलेश श्रीधर वाणी (३०) हे दोन सख्खे भाऊ आणि त्यांच्या सोबत जितेंद्र मुरलीधर भोकरे (४७) हे कारने मनुदेवी येत असताना चोपडा तालुक्यातील मजरेहोळ फाट्याजवळ रस्ते खराब असल्याने कारचे आधी मागचे आणि नंतर पुढचे असे दोनही टायर फुटल्याने कार समोरून येणाऱ्या एस.टी.बस वर जावून आदळली. यात मागे बसलेले तिघही इसम जागीच ठार झाल्याची दुर्दैवी घटना घडली आहे.

तिघही मृतांना आणि जखमी चालक चोपडा उप जिल्हा रुग्णालयात आणण्यात आले. अपघाताची बातमी शहरात पसरताच रुग्णालय परिसरात गर्दी झाली. मृतांवर शवविच्छेदन करून निजामपूर येथे अंत्यसंस्कार करण्यासाठी नातेवाईकांच्या ताब्यात देण्यात आले. याप्रकरणी चोपडा शहर पोलिस स्टेशनला गुन्हा दाखल करण्यात आला असून पोलिस तपास करीत आहे.