निंभोरा/रावेर : रावेर येथील केळी उत्पादक शेतकरी व व्यापाऱ्यांनी इतिहासात प्रथमच निंभोरा रेल्वेस्थानकावर १६ व्हीपीयू केळी वॅगन्सचा रॅक भरले. यामुळे येथील फळबागायतदार शेतकरी मंडळ व केळी उत्पादकांत मोठ्या प्रमाणात रोष निर्माण झाला असून, केळी उत्पादक शेतकऱ्यांसह केळी कामगारांनीही याबाबत तीव्र नाराजी व्यक्त केली आहे. (Banana wagons rack will be filled from Raver)

येथील रेल्वेस्थानकावर निंभोरा येथील फळबागायतदार शेतकरी मंडळाद्वारे व केळी उत्पादकांनी गेल्या जून महिन्यापासून केळी वॅगन रॅक सुरळीतपणे भरणे सुरू असताना शनिवारी (ता. ३) रावेर येथील व्यापाऱ्यांनी व युनियन पदाधिकाऱ्यांनी निंभोरा रेल्वेस्थानकावर इतिहासात प्रथमच केळी वॅगन्स रॅक भरल्याने निंभोरा येथील फळबागायतदार मंडळ व केळी उत्पादकांत नाराजी आहे.

याबाबत रावेर युनियनचे अध्यक्ष रामदास पाटील यांनी पत्रकारांना माहिती देताना सांगितले, की निंभोरा येथील फळबागायतदार शेतकरी मंडळाला व केळी उत्पादकांना चुकीची व खोटी दिशाभूल करणारी माहिती दिली गेली असल्याने त्यांचा आमच्या संदर्भात गैरसमज झाला आहे. (latest marathi news)

श्री. पाटील यांनी निंभोरा फळबागायतदार शेतकरी मंडळाचे अध्यक्ष कडू चौधरी यांच्याशी चर्चा केली. निंभोरा फळबागायतदार शेतकरी मंडळाशी समन्वय साधून यापुढे सहकार्याची भूमिका ठेवू, असे त्यांनी आश्वस्त केले.

त्याचबरोबर यापुढे रावेर येथूनच केळी वॅगन्स रॅक भरणार असल्याने कोणीही गैरसमज करून घेऊ नये, आमच्याकडून कोणालाही आर्थिक व मानसिक नुकसान होईल, असा प्रयत्न नव्हता; परंतु काही कारणास्तव निंभोरा येथे रेल्वे वॅगन्स रॅक भरला गेला, यापुढे रावेर येथूनच केळी वॅगन्स रॅक भरले जातील, असे पाटील यांनी स्पष्ट सांगितले.

कामगारांचाही रोष

रावेर येथील शेतकरी आणि व्यापाऱ्यांनी निंभोरा येथे रेल्वेस्थानकावर केळी वॅगनचा रॅक भरल्याने त्यांनी त्यासाठी लागणारे सर्व केळी कामगार रावेर येथूनच आणली होती. यामुळे निंभोरा येथील स्थानिक केळी कामगारांचा रोजगार बुडाला. त्याचा रोषही रावेरच्या उत्पादक शेतकऱ्यांना सहन करावा लागला.