Jalgaon Fraud Crime : भारतीय सैन्यातील जवानांची वैद्यकीय तपासणी करायचे सांगून फोन-पेची संपूर्ण माहिती घेऊन डॉ. सुजाता प्रमोद महाजन (वय ६२, रा. गांधीनगर, जिल्हा पेठ) यांची एक लाख २४ हजार ९९२ रुपयांमध्ये फसवणूक करण्यात आली. २१ मेस झालेल्या या प्रकाराविरुद्ध १० जूनला जिल्हापेठ पोलिस ठाण्यात फसवणुकीचा गुन्हा दाखल झाला आहे. गांधीनगरात डॉ. सुजाता महाजन यांचे हॉस्पिटल असून, २० मेस त्यांच्या मोबाईलवर अनोळखी क्रमांकावरून फोन आला. (case of fraud has been registered by asking for medical examination of Indian army personnel )

मी सैन्य दलातील अधिकारी बोलत असून, तुमच्याकडे जवानांची वैद्यकीय तपासणी करायचे असल्याचे सांगितले. त्यासाठी त्याने व्हिजिटिंग कार्ड मागविले. त्यानुसार डॉक्टरांच्या चालकाने त्याच्या मोबाईलवरून कार्ड पाठविले. दुसऱ्या दिवशी डॉ. प्रमोद महाजन यांना ४० ते ५० जवानांची तपासणी करायचे त्याने असल्याचे सांगितले. डॉ. प्रमोद महाजन यांनी पत्नी डॉ. सुजाता महाजन यांचा फोन-पे क्रमांक त्याला दिला.

बोलणे सुरू असताना, फोन-पे ॲपवर डॉ. सुजाता महाजन यांच्या बँक खात्यातून पैसे ट्रान्सफर होऊ लागले. काही वेळातच त्यांच्या खात्यातून एक लाख २४ हजार ९९२ रुपये विड्रॉल करण्यात आले. याबाबत डॉ. सुजाता महाजन यांनी १० जूनला दिलेल्या फिर्यादीवरून जिल्हापेठ पोलिस ठाण्यात गुन्हा दाखल झाला आहे.