Jalgaon News : शनिपेठ पोलिस ठाण्यातील गुन्हेशोध पथकाने एकाच दिवसात तीन गुन्हे उघडकीस आणून संशयीतांना बेड्या ठोकल्या.

शनिपेठ पोलिस ठाण्याचे निरीक्षक रंगनाथ धारबळे यांच्या गुन्हेशोध पथकाने तीन गुन्ह्यांतील संशयीतांना एकाच दिवशी गजाआड करून तिहेरी कामगिरी केली.

फरार भोंदू अटकेत

आसोदा रोड परिसरात २६ जानेवारी २०२२ ला छाया रतन बाविस्कर या महिलेच्या घरी पूजेसाठी आलेल्या भोंदूबाबाने वास्तुदोष काढण्याच्या बहाण्याने सोन्याचे मंगळसूत्र व कानातील सोन्याचे दागिणे लंपास केले होते.

या गुन्ह्यातील दोन वर्षापासून फरार भोंदू हरीश ऊर्फ हरी गुलाब गदाई (रा. देवगाव राजापूर) हा पहुर ता.जामनेर येथे असल्याची माहितीवरून उपनिरीक्षक योगेश ढिकले, सहाय्यक फौजदार हरीश जाधव, राहुल पाटील, अनिल कांबळे आणि भागवत शिंदे यांच्या पथकाने काल रविवार (ता.१८) अटक केली. पोलिसांनी त्याच्याकडून चोरीचा ऐवज हस्तगत केला.

पिस्तूलधारी अटकेत

शहरातील काशीबाई उखाजी कोल्हे शाळेमागील परिसरात एक जण हातात पिस्तूल घेत दहशत करणाऱ्या ईश्वर रामा पारधी (वय २३ धानोरा ता.जळगाव) याला गावठी पिस्तूलसह अटक केली. गुन्हेशोध पथकाने रविवार (ता.१८) सायंकाळी पोलिस नाईक राहुल पाटील यांच्या तक्रारीवरून गुन्हा दाखल करण्यात आला आहे.

घरफोडी उघडकीस

कांचन नगर परिसरातील संजय केशवराव मोहिते (वय ६१) मागील आठवड्यात ११ ते १३ फेब्रुवारी दरम्यान देवदर्शनाला उज्जैन येथे गेले असताना त्यांच्या बंद घराच्या दाराच्या कडी कोयंडा तोडून चोरट्यांनी ऐवज चोरला होता. पोलिसांनी या प्रकरणात संशयित शुभम दिलीप सोनवणे (रा. कांचन नगर) याच्यासह एक विधीसंघर्षीत बालकाला अटक केली आहे.