Jalgaon Cyber Fraud : शहरातील तीन भामट्यांनी दिल्ली येथील डॉक्टर महिलेस ३६ लाखांचा ऑनलाइन गंडा घातला. या प्रकरणी तिघांना दिल्ली पोलिसांनी अटक केली आहे. दिल्ली येथील रहिवासी डॉ. निकिता आनंद महेंद्र प्रसाद यांना ऑनलाइन गुंतवणुकीच्या आधारे भुसावळच्या तीन भामट्यांनी प्रवृत्त केले व शेअर इंडिया नावाच्या कंपनीत व्यापाराचे एक गुलाबी चित्र दाखविले. (Cyber ​​Fraud 3 fraudsters in Bhusawal arrested by Delhi Police )

ज्यामुळे डॉ. प्रसाद यांनी ३६ लाख २७ हजार रुपयांची गुंतवणूक केली. तिच्या गुंतवणुकीचे मूल्य अंदाजे २.३६ कोटी दाखविण्यात आले. गुंतवलेली रक्कम काढण्याचा प्रयत्न केला असता या भामट्यांनी आपली फसवणूक केल्याचे तिच्या लक्षात आले. त्यामुळे कथित घटनेला ही महिला बळी पडल्याने पीएस सायबर, दक्षिण पश्चिम, दिल्ली येथे २६ जुलैला गुन्हा दाखल करण्यात आला होता.

या गुन्ह्यातील तीन संशयितांना दिल्ली पोलिसांनी शुक्रवारी (ता. २) भुसावळमधून ताब्यात घेऊन दिल्ली रवाना झाले. या प्रकरणी संशयित जयेश अनिल भोळे (वय २९, रा. दत्त नगर, वांजोळा रोड, भुसावळ), राकेश जाधव (वय २४, रा. पुष्पछाया अपार्टमेंट, सी-२६, रेल्वेस्थानक फिल्टर हाऊसजवळ, भुसावळ), हर्षवर्धन राजेश भोसले (वय ३३, रा. गौतम हाउसिंग सोसायटी, कंडारी, ता. भुसावळ) यांना दिल्ली पोलिसांनी भुसावळ शहरातून ताब्यात घेऊन पुढील तपासकामी दिल्ली रवाना झाले.