Jalgaon Crime News : अल्पवयीन मुलांच्या मदतीने जळगाव शहरातील दुचाकींची चोरणाऱ्या टोळीला शहर पोलिस ठाण्यातील गुन्हे शोध पथकाने गजाआड केले. त्यांच्याकडून चोरीच्या आठ दुचाकी हस्तगत केल्या असून, त्यांच्याविरुद्ध गुन्हा दाखल झाला आहे. पोलिस अधीक्षक डॉ. महेश्र्वर रेड्डी, उपअधीक्षक संदीप गावित यांच्या सूचनेवरून निरीक्षक अनिल भवारी यांच्यासह गुन्हे शोध पथकातील अमोल ठाकूर, भास्कर ठाकरे, सुधीर साळवे व योगेश पाटील यांना एक तरुण संशयास्पद दुचाकी घेऊन जाताना आढळून आला. ()

या पथकाने त्याला ताब्यात घेतले व त्याची चौकशी केली असता, त्याने उडवाउडवीची उत्तरे दिले. पोलिसी खाक्या दाखवताच त्याने त्याच्या साथीदारांची नावे सांगितली. पोलिस पथकाने शुभम भगवान चौधरी (वय २५), मोईन मुक्तार मणियार (वय १८), ओम सुरेश हटकर (वय १८, तिघे रा. रिंगणगाव, ता. एरंडोल) यांना ताब्यात घेतले. पोलिसी पाहुणचार केल्यावर तिघा संशयितांनी शहरातील विविध भागांमधून दुचाकी चोरी केल्याची कबुली दिली व आठ दुचाकी काढून दिल्या.