Jalgaon News : दरवर्षी यावल वनविभागाच्या क्षेत्रात वणवे लागत आहेत. वणवे रोखण्यासाठी कोणताही ठोस उपाय होत नसल्याने सातपुडा वणव्यापासून सुरक्षित राहिला नाही, मात्र वनविभागाच्या हद्दीत वणवा लागल्याने यात वृक्षांची होळी होऊन कोट्यवधी रुपयांच्या शासकीय निधीचीही यानिमित्ताने राख सुरु आहे. शासकीय नियम फक्त कागदात बोलतात हेच खरे याचा अनुभव अशा अनेक घटनांतून समोर येतो. (Jalgaon News)

वने वाचवण्यासाठी वनविभाग, संयुक्त वन व्यवस्थापन समिती व संबंधित भागातील ग्रामपंचायतीने पुढाकार घेणे गरजेचे आहे. वन विभागाच्या माध्यमातून सातपुड्याच्या पायथ्याशी असलेल्या गावामध्ये संयुक्त वन व्यवस्थापन समिती स्थापन करण्यात आल्या होत्या मात्र त्या समित्या कागदोपत्रीच राहिल्याचा प्रत्यय दिसून येतो आहे.

वनसंपदेचा ऱ्हास

सातपुडा पर्वतात लहान-मोठी झाडेझुडपे, हिरवेगार गवत, वृक्षवेली असल्याने डोंगरावर ससे, तरस, माकड, लांडगा, कोल्हे, रानडुक्कर, लांडोर, मोर, या सारख्या लहान-मोठ्या प्राण्यांचा वावर असतो.

मात्र वणव्यामुळे जंगलातील प्राणी, झाडेझुडपे, वनऔषधी वनस्पती होरपळून नष्ट होतात. पक्ष्यांची अंडी, घरटी, पिल्ले जळून नष्ट होतात. वन्य प्राण्यासह जीवसृष्टीचा ऱ्हास होत असून तो टाळण्यासाठी प्रयत्न होणे गरजेचे आहे.