पहूर, ता.जामनेर : गेल्या दोन दिवसांपासून सुरू असलेल्या संततधार पावसामुळे जामनेर तालुक्यातील खडकी नदीला आलेल्या पुरात वाहून जाणाऱ्या रोही प्राण्याला मांडवे बुद्रुक येथील तरुणांनी स्वतःचा जीव धोक्यात घालून जिवदान देत भुतदयेचा आदर्श वस्तुपाठच निर्माण केला . हि घटना आज मंगळवारी ( ता . २८ )दुपारी अडीच वाजेच्या सुमारास घडली .

याबाबत सविस्तर वृत्त असे की, गेल्या दोन दिवसांपासून सर्वत्र संततधार पाऊस सुरू आहे . त्यामुळे सर्वच नद्या-नाले दुथडी भरून वाहत आहेत. आज मंगळवारी दुपारी अडीच वाजेच्या सुमारास जामनेर तालुक्यातील मांडवे बुद्रुक येथून वाहणाऱ्या खडकी नदीत रोही प्राणी वाहत असल्याचे पूर पहाव्यास आलेल्या मुलांना दिसले. गावातीलच मजीत अब्‍बास तडवी या तरुणाने स्वतःचा जीव धोक्यात घालून वाहणाऱ्या रोहिस किनाऱ्याला लावले. सुमारे दोन किलोमीटर नदी अंतर सदर रोही वाहत आला.

त्याच्या पायाला त्यामुळे दुखापत झाली. मांडवे बुद्रुक गावचे पोलिस पाटील सागर गोपीचंद जाधव, अजित तडवी, आशिक तडवी, गणेश जाधव ,सलीम तडवी, आरिफ तडवी, प्रकाश जाधव, आबा तडवी,अमर तडवी, जावेद तडवी,भूषण तडवी, युवराज जाधव, हसन तडवी, राजू इंगळे, संजय जाधव, दिपक जाधव, या तरुणांनी प्रयत्नांची पराकाष्ठा करून मुक्या जीवास जीवदान दिले .

पोलीस पाटील सागर जाधव यांनी तत्काळ वन विभागाचे महाजन यांना फोन द्वारे माहिती दिली. पहूर पोलिस ठाण्याचे पोलिस निरीक्षक अरुण धनवडे हवालदार देशमुख यांना माहिती मिळताच देशमुख आणि महाजन यांनी घटनास्थळी धाव घेतली. पुरात वाहून आलेल्या रोहीवर (मादी) प्रथमोपचार करून जामनेर वनविभागाच्या स्वाधीन करण्यात आले. स्वतःचा जीव धोक्यात घालून वन्यजीवास जीवनदान दिल्याबद्दल मांडवे बुद्रुक येथील ग्रामस्थांचे कौतुक होत आहे .