भुसावळ : येथे महायुतीचा पहिला कार्यकर्ता मेळावा तब्बल अडिच तास उशिरा सुरू झाला मात्र जमलेल्या कार्यकर्त्यांचा गप्पाचा विषय लोकसभा निवडणुक नव्हता तर चक्क आगामी पालिका निवडणुका हाच होता. कोण कुठून उभा राहिल, संबंधित वॉर्ड राखीव झाला तर काय होईल, माझी तयारी कुठून आहे असे चर्चेचे विषय होते. (Jalgaon Lok Sabha Election)

स्टार लॉनमधील राजवाडा हॉल भागात रक्षा खडसे यांच्या प्रचारार्थ महायुतीचा पहिला कार्यकर्ता मेळावा आयोजित करण्यात आला होता. वेळ सायंकाळी पाच वाजेची दिली होती. भाजपचे कार्यकर्ते जमायला सुरुवात झाली. साडे सहा वाजेपर्यंत कार्यकर्ते हॉल बाहेरच गप्पा मारत बसले होते. आत गेल्यावर देखील प्रत्यक्ष मेळावा साडेसात वाजता सुरू झाला.

त्यामुळे दरम्यानच्या काळात माजी नगरसेवक, इच्छुक उमेदवार यांच्यात आगामी पालिका निवडणुका आपल्या वॉर्डातील समस्या यावर चर्चा रंगत होत्या. एक इच्छुक म्हणाला, ‘मी दोन वॉर्डातून तयारी करत आहे. मात्र कोणता वॉर्ड एस.टी. साठी राखीव होतो त्यानुसार निर्णय घेईल. अर्थात आमदार साहेबांनी संधी दिली पाहिजे.’

तर दुसरा इच्छुक म्हणाला, ‘माझा भाऊ गेल्यावेळेस अगदी थोड्या मतांनी पराभुत झाला. आता मात्र इतर सर्व कामे कमी करुन फक्त वॉर्डातील कामावर लक्ष केंद्रित केले आहे, त्यामुळे विजय निश्चित होईल.’ तर दुसरीकडे माजी नगरसेवकांच्या ग्रुपमध्ये व्हॉल्व्ह खराब असल्याने आमच्या वॉर्डात व्यवस्थित पाणी येत नाही यावरदेखील चर्चा रंगली होती. (latest marathi news)

टायगर अभी जिंदा है.....पण....

वॉर्डाच्या गप्पा सुरू असतानाच एकाने विषय काढला महाविकास आघाडीचा उमेदवार म्हणून माजी आमदार संतोष चौधरी यांचे नाव निश्चित झाल्याचे समजले. असे सांगताच दुसरा म्हणाला तसे काही नाही. तेव्हा तो म्हणाला चौधरी यांचे मध्यंतरी जंगी स्वागत व रॅली निघाली यावरुन त्यांनी दाखवून दिले, टायगर अभी जिंदा है !

त्यावर दुसऱ्याने तत्काळ प्रतिक्रिया दिली, ‘लेकिन टायगर को पकडने के लिए पिंजरे भी तय्यार है !’ आणि एकच हंशा पिकला. एकेकाळी त्या टायगरच्या जंगलात आपण देखील होतो. पण कोणता प्राणी होतो हे ज्याने त्याने समजुन घ्यावे, असेही तो म्हणाला.