Jalgaon News : जिल्ह्यात कापसाला मागील वर्षी मिळालेला कमी दर पाहता, यंदा शेतकऱ्यांनी मका, उडीद, मूग, तुरीचा पेरा वाढविला आहे. मागील वर्षी मक्याला २८०० ते ३ हजारांचा दर, तर उडीद, मूग, तुरीला सरासरी ८ ते साडेआठ हजार रुपयांचा दर मिळाला होता. यामुळे शेतकऱ्यांनी कपाशीचा पेरा केला. (Jalgaon Agriculture News)

मात्र, तो मागील वर्षीच्या तुलनेत कमी आहे. जिल्ह्यात खरिपाच्या आतापर्यंत ९७ टक्के पेरण्या झाल्या आहेत. जिल्ह्यात यंदा खरिपाचा ७ लाख ५९ हजार ६०१ हेक्टर क्षेत्रावर पेरा होईल, असा अंदाज जिल्हा कृषी विभागाने व्यक्त केला होता. त्यादृष्टीने बी-बियाणे, खतांचे नियोजन केले होते. जूनच्या शेवटच्या आठवड्यापासून बळीराजाने चाढ्यावर मूठ धरण्यास सुरवात केली.

पेरणीनंतर पिकांसाठी योग्य पाऊस झाल्याने खरीप पिके बहरली आहेत. सध्या गेल्या तीन ते चार दिवसांपासून संततधारेने शेतात पाणी साचले होते. मात्र, मंगळवारी (ता. ३०) दिवसभर सूर्यप्रकाश असल्याने शेतकरी शेतात आंतरमशागत करताना दिसून आले. अजून दोन दिवस तरी पावसाने उघडीप दिल्यास शेतातील तण काढून, खते देण्यासाठी वेळ मिळेल, असे शेतकऱ्यांना वाटते. (latest marathi news)

जिल्ह्यात आतापर्यंत ३७० मिलिमीटर

जिल्ह्यात आतापर्यंत एकूण सरासरीच्या (६३२ मिलिमीटर) आजपर्यंत ३७० मिलिमीटर अर्थात ५६.७ टक्के पाऊस झाला आहे.

"यंदा मका, तूर, उडीद, मुगाचे क्षेत्र वाढले आहे. कपाशीचा पेरा सरासरीपेक्षा कमी आहे. मक्याला २८०० ते तीन हजारांचा दर, उडीद, तूर, मुगाला ८ ते ८५०० दर मिळाला होता."- के. एम. तडवी, जिल्हा अधीक्षक कृषी अधिकारी

जिल्ह्यात झालेल्या पेरण्या अशा

*कापूस : ५ लाख ९ हजार ५८ हेक्टर

*मका : १ लाख १७ हजार ४५९

*सोयाबीन : १८ हजार २७३

*ज्वारी : १५ हजार ५५०

*बाजरी : ६ हजार १२१

*तूर : १३ हजार ८३१

*मूग : १४ हजार ९०८

*उडीद : १४ हजार ८४४