जळगाव : जळगाव (Jalgaon) जिल्हा बँक (bank) संचालक मंडळ निवडणुकीसाठी खासदार, आमदार यांच्यासह अनेक दिग्गजांनी सोमवारी अर्ज दाखल केले. २१ जागांसाठी सोमवारी तब्बल १७४ अर्ज दाखल झाले. आजपर्यंत दाखल अर्जांची संख्या २७९ आहे. बुधवारी अर्जांची छाननी होईल. अर्ज मागे घेण्याची ८ नोव्हेंबर शेवटची मुदत आहे.

जळगाव जिल्हा बँक संचालक मंडळ निवडणुकीसाठी अर्ज दाखल करण्याचा सोमवारी शेवटचा दिवस होता. त्यामुळे अर्ज दाखल करण्यासाठी जिल्हा बँकेत गर्दी झाली होती.

सर्वपक्षीय पॅनल रद्द झाल्यानंतर भाजप, काँग्रेस, राष्ट्रवादी काँग्रेस व शिवसेनेतर्फे उमेदवारी अर्ज भरण्यासाठी गर्दी झाली होती. भाजपतर्फे माजी मंत्री गिरीश महाजन, खासदार रक्षा खडसे, उन्मेष पाटील, आमदार मंगेश चव्हाण, आमदार संजय सावकारे, करण पवार, माजी आमदार स्मिता वाघ, माजी खासदार ए. टी. पाटील आदींनी उमेदवारी अर्ज दाखल केला. राष्ट्रवादी काँग्रेसतर्फे रोहिणी खडसे, माजी मंत्री गुलाबराव देवकर, डॉ. सतीश पाटील, संजय पवार, आमदार अनिल पाटील, तिलोत्तमा पाटील, माजी आमदार संतोष चौधरी, सचिन चौधरी, संगीता वाल्मिक पाटील, सोनल संजय पवार, राजीव देशमुख, प्रदीप देशमुख, कैलास पाटील, इंदिराबाई पाटील आदींनी अर्ज दाखल केला.

काँगेसतर्फे राजीव पाटील, सुरेश श्‍यामराव पाटील, अविनाश भालेराव, उदयसिंग पाटील यांनी अर्ज भरले. शिवसेनेतर्फे श्‍यामकांत सोनवणे, महापौर जयश्री महाजन, महानंदा पाटील यांनी उमेदवारी अर्ज दाखल केले.

गटनिहाय एकूण दाखल अर्ज

वि. का. सोसायटी : जळगाव ११, भुसावळ ८, यावल ७, रावेर ८, मुक्ताईनगर ७, बोदवड ६, जामनेर ६, पाचोरा ७, भडगाव ९, चाळीसगाव ९, पारोळा ४, अमळनेर ७, चोपडा १५, धरणगाव ४, एरंडोल ४.