Jalgaon News : राजे छत्रपती शिवाजी महाराज यांची जयंती सोमवारी (ता. १९) सर्वत्र साजरी होत आहे. त्या पार्श्वभूमीवर पारोळा तालुक्यातील शिवप्रेमींकडून विविध कार्यक्रम होणार आहेत. दरम्यान, तालुक्यातील कायदा व सुव्यवस्था अबाधित राखण्यासाठी शिवजन्मोत्सव शांततेत साजरा करा, असे आवाहन पोलिस उपविभागीय अधिकारी सुनील नंदवाळकर यांनी केले. (Jalgaon DYSP Sunil Nandwalkar statement Celebrate Shivjanmotsav in peace)

येथील पोलिस ठाण्यात शुक्रवारी (ता. १६) पारोळा पोलिस ठाणे येथे आयोजित शिवजयंतीनिमित्त बैठकीप्रसंगी बोलत होते. या वेळी मराठा सेवा संघाचे तालुकाध्यक्ष डॉ. शांताराम पाटील, शहराध्यक्ष महेश पाटील, शीतल ॲकॅडमीचे संचालक रवींद्र पाटील यांच्यासह शहरातील मराठा सेवा संघ व विविध सामाजिक संघटनांचे पदाधिकारी उपस्थित होते.

या प्रसंगी पोलिस निरीक्षक सुनील पवार यांनी शिवजयंतीनिमित्त आयोजित विविध कार्यक्रमांबाबत माहिती दिली. या वेळी उपविभागीय अधिकारी नंदवाळकर म्हणाले, की तालुक्यात आजवर अनेक सण, उत्सव, जयंती मोठ्या प्रमाणात साजरा करण्यात आले आहेत.

या प्रत्येक सोहळ्यात सर्वजण सर्व समावेशकपणे साजरा करीत असतात. तसेच शिवजन्मोत्सव सालाबादप्रमाणे यावर्षी देखील सर्व शिवप्रेमी यांनी शांततेत साजरा करावा, असे आवाहन देखील त्यांनी यावेळी केले.

या वेळी गोपनीय विभागाचे महेश पाटील यांनी आभार मानले. यशस्वितेसाठी पोलिस कर्मचारी किशोर भोई यांनी सहकार्य केले. दरम्यान, बैठकीनंतर उपविभागीय पोलिस अधिकारी यांनी शिवतीर्थ येथे भेट देत विविध कार्यक्रमांचा आढावा घेतला.