अजय कोतकर : सकाळ वृत्तसेवा

चाळीसगाव : एकादशीनिमित्त श्री क्षेत्र पंढरपूर वारीसाठी येथील महाराष्ट्र राज्य मार्ग परिवहन महामंडळाच्या आगारातून विशेष बस सोडण्यात आल्या होत्या. जवळपास ३० बसेसच्या माध्यमातून सुमारे १३ हजार प्रवाशांनी प्रवास केला. ११ ते १८ जुलै या पंचमी ते एकादशीपर्यंतच्या आठ दिवसांच्या कालावधीत आगाराला सवलतींसह एकूण २८ लाख ९७ हजार २२६ रुपयांचे उत्पन्न प्राप्त झाले, अशी माहिती आगारप्रमुख मयूर पाटील यांनी दिली.

आषाढी एकादशीनिमित्त पंढरपूर येथे विठूरायाच्या दर्शनाला लाखो वारकरी पायी दिंडीद्वारे जातात. मात्र, ज्यांना पायी जाणे शक्य होत नाही. त्यांच्यासाठी येथील बस स्थानकातून थेट पंढरपूरपर्यंत विशेष बसेसचे नियोजन करण्यात आले होते.

त्यासाठी ११ जुलैपासून २५ बसेस राखीव ठेवण्यात आल्या होत्या. आठ दिवसांच्या कालावधीत एकूण १४६ फेऱ्या झाल्या. ज्या ४८ हजार २४५ किलोमीटर धावल्या. त्यात विना सवलत व सवलतीसह २८ लाख ९७ हजार २४५ रुपये उत्पन्न मिळाले, असेही आगार प्रमुख मयूर पाटील यांनी सांगितले.

वेळेचे नियोजन

आपल्या कुटुंबीयांसमवेत ५ ते १२ वयोगटातील लहान मुला-मुलींनी देखील प्रवास केला. भाविकांची येण्या-जाण्याची कोणतीही गैरसोय होऊ नये, यासाठी पंढरपूरला जाण्यासाठी आणि तेथून येण्यासाठी बसेसच्या वेळेचे नियोजन करण्यात आले होते. (latest marathi news)

"चाळीसगाव आगारात एकूण ६४ बसेस आहेत. दररोज २२५ फेऱ्या होतात. यात लांब पल्ला, मध्यम लांब पल्ला तसेच ग्रामीण फेऱ्यांचा समावेश आहे. साधारणतः २० हजार ९०० किलोमीटर या बसेस धावतात. त्याद्वारे दररोजचे किमान पाच लाख रुपयांपर्यंत आगाराला उत्पन्न मिळते. यासाठी चालक, वाहकांसह आगारातील कर्मचारी व प्रवाशांचे योगदान लाभले आहे."- मयूर पाटील, आगारप्रमुख, चाळीसगाव

आगारातील स्थिती दृष्टीक्षेपात

एकूण बसेस ......... ३०

एकूण प्रवासी ........ १३ हजार

एकूण फेऱ्या ......... १४६

एकूण किलोमीटर .... ४८ हजार २४५

एकूण उत्पन्न .......... २८ लाख ९७ हजार २२६