जळगाव : जळगाव लोकसभा मतदारसंघाची उमेदवारी आता बदलली जाणार नाही, असे मत पक्षाच्या उमेदवार माजी आमदार स्मिता वाघ यांनी व्यक्त केले. उमेदवारी बदलाबाबत सुरू असलेल्या चर्चेवर त्यांनी आज आपले स्पष्ट मत व्यक्त केले. जळगाव लोकसभा मतदारसंघात भाजपने माजी आमदार स्मिता वाघ यांना उमेदवारी जाहीर केली आहे. (Jalgaon Smita Wagh statement Lok Sabha Election candidate will not change)

त्यांनी आपला प्रचारही सुरू केला आहे. परंतु त्यांच्या उमेदवारीबाबत नाराजी असल्याची पक्षांतर्गत चर्चा सुरू झाली आहे. माजी खासदार ए. टी.पाटील उमेदवारीसाठी प्रयत्न करीत असल्याचे सांगण्यात येत आहे. गेल्या पंचवार्षिक निवडणूकीत भाजपने स्मिता वाघ यांची उमेदवारी ऐनवेळी रद्द केली होती.

याबाबत जळगाव येथील निवासस्थानी पत्रकारांशी बोलतांना वाघ म्हणाल्या, उमेदवारी जाहीर झाल्यानंतर मी प्रचाराला सुरूवात केली आहे. मी लोकांपर्यंत पोहोचते आहे. लोक म्हणत आहेत, पक्षाने लोकसभेची उमेदवारी देवून तुम्हाला न्याय दिला आहे. जळगाव लोकसभेच्या उमेदवारी बदलाबाबत त्या म्हणाल्या, जळगाव लोकसभेचे तिकीट बदलले जाणार नाही. (latest marathi news)

गिरीश महाजन यांनी चार पाच दिवसांपूर्वीच सांगितले की, कोणत्याही परिस्थितीत तिकीट बदलले जाणार नाही, उमेदवारी अर्ज दाखल होईपर्यंत हे चालणारे चक्र आहे, प्रत्येकाला उमेदवारीची इच्छा असते. त्यामुळे व्यक्ती बोलत असतात. परंतु ही राष्ट्रीय पार्टी आहे, एकदा निर्णय बदलला म्हणजे दरवेळी तसेच होईल असे काही नसते.

माझ्या मते जळगाव लोकसभेचे तिकीट बदलण्याची आता कोणत्याही परिस्थितीत शक्यता नाही. जळगाव मतदारसंघातून इच्छुक असलेले माजी खासदार ए. टी.पाटील यांची व माझी भेट झाली तेव्हा ते म्हणाले, ताई मी तुमच्या सोबत आहे. ते ज्यावेळी दहा वर्षे खासदार होते. त्यावेळी त्यांच्या प्रचाराची धुरा आम्ही सांभाळली आहे. त्यामुळे आताही ते महायुती व पार्टीसोबतच राहतील, असेही स्मिता वाघ यांनी नमूद केले.