जळगाव : पंढरपूर येथे विठ्ठलाच्या दर्शनासाठी जाणाऱ्या भाविकांना जळगाव येथून थेट पंढरपूर बससेवा (Bus Service) सुरू करण्यात आली आहे. अडीच वर्षानंतर कायमस्वरूपी बससेवा सुरू करण्यात आली असल्याचे महामंडळातर्फे (MSRTC) सांगण्यात आले आहे. (Jalgaon to Pandharpur bus service started Jalgaon News)

्एसटी महामंडळातर्फे पंढरपूर येथे भाविकांना दर्शनासाठी जळगाव ते पंढरपूर बससेवा सुरू करण्यात आली होती. मात्र कोरोना संसर्गाच्या काळात ही बससेवा बंद करण्यात आली होती. कोरोना संसर्ग कमी झाल्यानंतर ही बससेवा कायमस्वरूपी सुरू करण्यात यावी, अशी मागणी करण्यात आली होती. दिवाळीच्या काळात ही सेवा सुरू करण्यात येणार होती मात्र एसटी कर्मचाऱ्यांच्या संपामुळे ही सेवा लांबणीवर पडली. आता आषाढी यात्रेच्या पार्श्वभूमीवर ही सेवा सुरू करण्यात आली आहे. तब्बल अडीच वर्षानंतर भाविकांना आता पंढरपूरसाठी थेट बस जळगाव आगारातून उपलब्ध होणार आहे.

१५ जूनपासून ही सेवा सुरू झाली असून सकाळी आठ वाजता जळगाव बसस्थानकातून ही बस पंढरपूरसाठी सोडण्यात आली. आगारातून प्रवाशांच्या हस्ते हिरवी झेंडी दाखवून बससेवा सुरू करण्यात आली. यावेळी आगार व्यवस्थापक पंकज महाजन, वाहतूक निरीक्षक मनोज तिवारी व इतर कर्मचारी उपस्थित होते. औरंगाबाद, नगर, टेंभूर्णीमार्गे ही बस पंढरपूर येथे जाईल. तर पंढरपूर येथून पहाटे पाच वाजता जळगावसाठी ही बस रवाना होईल. विविध सवलतधारक प्रवाशांनाही या बससेवेचा लाभ घेता येणार आहे. या शिवाय पंढरपूर आषाढी यात्रेसाठी विशेष गाड्या सोडण्यात येणार असल्याचेही जळगाव येथील आगार व्यवस्थापक पंकज महाजन यांनी कळविले आहे.