वरणगाव : राष्ट्रीय महामार्ग क्रमांक सहावर कपिल वस्तीजवळ रात्री उलट्या बाजूने भरधाव येणाऱ्या दुचाकीने समोरून येणाऱ्या दुचाकीला जोरदार धडक दिली. त्यात वरणगाव येथील दुचाकीस्वार तरुण ठार झाला. दादाराव नारायण जमदाडे (वय ३६, मूळ रा. मन्यारखेडा, ह.मु. वामननगर, वरणगाव) असे मृताचे नाव आहे. या अपघातात दोन जखमी झाले आहेत. ही घटना शनिवारी (ता. २०) रात्री साडेबाराच्या सुमारास घडली. याबाबत वरणगाव पोलिसांत गुन्हा दाखल झाला आहे. (Jalgaon Varangaon youth killed in collision between two bikes)

दादाराव दुचाकीने (एमएच १९, एएच ४७३९) दीपनगर येथून रात्री बाराला ड्यूटीवरून घरी वरणगावला येत होता. त्यास समोरून आलेल्या हिरोहोंडा शाईन कंपनीच्या दुचाकीवरील (एमएच १९, डीए ७९२६) चालक साजीद अहमद (पूर्ण नाव माहीत नाही) याने उलट्या बाजूने भरधाव चालवीत धडक दिली.

त्यात दादाराव नारायण जमदाडे यांच्या डोक्याला जबर मार लागल्याने त्यांचा जागीच मृत्यू झाला, तर साजीद अहमद याच्यासह त्याच्यासोबत असलेला इसम (नाव गाव माहीत नाही) जखमी झाले. याबाबत सूर्यभान भिवराव जमदाडे (वय ३४, रा. मन्यारखेडा ता. भुसावळ) यांनी दिलेल्या फिर्यादीवरून वरणगाव पोलिस ठाण्यात साजीद अहमदविरुद्ध गुन्हा दाखल झाला आहे. पोलिस उपनिरीक्षक गणेश देशमुख, एएसआय मनोहर पाटील व प्रमोद कंखरे तपास करीत आहेत.