Jalgaon Accident News : शिरसोली रोडवरील हॉटेलमध्ये जेवणासाठी गेलेल्या कासमवाडीतील तरुण अपघातात ठार झाला, तर त्याचे तीन मित्र गंभीर जखमी झाले. कारवरील नियंत्रण सुटल्याने हा अपघात घडल्याचे प्रत्यक्षदर्शींनी सांगितले. आनंदा शांताराम सोनवणे असे मृत तरुणाचे नाव आहे. कासमवाडीतील आनंदा शांताराम सोनवणे (वय ३९), त्याचे भैरव भगवान राणे, पप्पू आढाव, योगेश रेंभोटकर रविवारी (ता. १४) शिरसोली गावाजवळील एका हॉटेलमध्ये जेवणासाठी कारने गेले होते. (youth from Kasamwadi was dead when his car went out of control )

जेवणानंतर कारने (एमएच १९, सीझेड १२१२) शिरसोली रोडवरून शहरात येत असताना, दुपारी चारच्या सुमारास गुलाबराव देवकर अभियांत्रिकी महाविद्यालयापुढे चालकाचे कारवरील नियंत्रण सुटल्याने सुसाट कार रस्त्याच्याकडेला कडूलिंबाच्या झाडावर आदळली. अपघातात आनंदा सोनवणे जागीच ठार झाला, तर कारमधील भैरव राणे, पप्पू आढाव, योगेश रेंभोटकर गंभीर जखमी झाले. वाहनधारक आणि ग्रामस्थांनी चौघांना अपघातग्रस्त कारमधून बाहेर काढून खासगी वाहनातनू जिल्‍हा रुग्णालयात रवाना केले. अपघाताची माहिती कळताच जिल्हा रुग्णालयात मित्रपरिवार व नातेवाइकांनी गर्दी केली होती.

...तर वाचला असता जीव

कारने कडूलिंबाच्या झाडाला धडक दिल्यावर बोनट आणि चेसीस चक्काचूर झाली. डॅशबोर्डपर्यंत झाडाचा बुंधा पोचला आहे. यावरून कारच्या वेगाचा अंदाज येतो. चालकासह कारमधील मित्रांनी सीटबेल्ट लावला असता, तर कदाचित कारच्या डॅशबोर्डसह इतर ठिकाणाहून एअरबॅग्ज्‌ उघडून जखमींना कमी दुखापत झाली असती. कदाचित चालकाचा जीवही वाचला असता, असे सांगण्यात आले.