जामनेर (जि. जळगाव) : तालुक्यातील शहापूर, गोंडखेड आणि मुंदखेडा येथील गावठी दारूच्या भट्टयांवर स्थानिक गुन्हे शाखेने धडक कारवाई करून सुमारे पावणेदोन लाखांचे गावठी दारू बनविण्याचे साहित्य जप्त केले. ही धडक कारवाई बुधवारी (१७) सकाळपासून सुरू करण्यात आली होती. अनेक दिवसांपासून तालुक्यासह परिसरात अवैध गावठी दारूची सर्रासपणे विक्री होत असल्याच्या तक्रारी प्राप्त झाल्या होत्या. त्याच अनुषंगाने स्थानिक गुन्हे शाखेच्या (एलसीबी) तीन पथकांद्वारे वेगवेगळ्या ठिकाणी या धाडी घालण्यात आल्या. (Latest Marathi News)

मोहिमेचे नेतृत्व पोलिस निरीक्षक किरणकुमार बकाले यांनी केले होते. सहाय्यक फौजदार अशोक महाजन, पोलिस हवालदार जितेंद्र पाटील, महेश महाजन, प्रीतम पाटील, भारत पाटील यांनी शहापूर तर सहाय्यक फौजदार अनिल जाधव, पोलिस हवालदार संदीप पाटील, किशोर राठोड, भगवान पाटील, विजय चौधरी यांनी गोंडखेड आणि सहायक फौजदार युनूस शेख, प्रमोद लाडवंजारी, किरण धनगर, रणजित जाधव, कृष्णा देशमुख यांच्या पथकाने मुंदखेड शिवारात कारवाई केली.

या कारवाईत चार संशयिताना ताब्यात घेण्यात आले. एक जण पसार होण्यात यशस्वी झाला. ताब्यात घेतलेल्यांमध्ये विनोद सुंदरलाल जोशी, नसीर रशीद तडवी (दोघे रा. वाकडी), रामा कौतिक कोळी, देविदास आनंदा कोळी (दोघे रा. गोंडखेड) तर संजय धनराज पवार (रा महुखेडा) हा फरार आहे.