Jalgaon News : येथील नवीनच तयार करण्यात आलेला रेल्वे पुलाची कमी उंचीमुळे नागरिकांना अपघाताचा धोका निर्माण झाला आहे. (Low height railway bridge is becoming dangerous jalgaon news)

कजगाव येथील मनमाड कंपनी भागात रेल्वेच्या तिसऱ्या व चौथ्या लाईनसाठी तयार करण्यात आलेल्या पुलाची उंची अत्यंत कमी असल्याने अनेकांना ये-जा करण्यासाठी कसरत करावी लागते. अनेक वेळा ग्रामस्थांना व शेतकऱ्यांना या कमी उंचीच्या पुलामुळे किरकोळ स्वरूपातील दुखापत झाल्याच्या घटनाही घडल्या आहेत.

या रस्त्यावरून कजगावहून वाडे, बांबरुड व अनेक ठिकाणी रस्ता जात आल्याने तसेच या रस्त्याने शेकडो शेतकऱ्यांच्या शेतजमीन असल्याने शिवाय गावाच्या पलिकडे असलेल्या लोकवस्तीतील नागरिकांना देखील कमी उंचीच्या पुलामुळे मोठा धोका निर्माण झाला आहे.

त्यामुळे या पुलाच्या उंचीसंदर्भात योग्य ते उपाय करून नागरिकांची टाळावी, अशी मागणी कजगाव परिसरातून केली जात आहे.

जुन्या पुलाप्रमाणे उंची ठेवावी

दरम्यान, या नवीनच तयार करण्यात आलेल्या पुलाबाबत अनेक लोकांच्या तक्रारी आहेत. या तक्रारी लक्षात घेता रेल्वे प्रशासनाने व संबंधितांनी तत्काळ पुलाच्या उंचीबाबत निर्णय घ्यावा, तसेच या पुलाची उंची ही जुन्या पुलाप्रमाणे ठेवण्याची मागणी केली जात आहे. या नवीन पुलाच्या खालून मोटारसायकल देखील जोखीम पत्करून खाली वाकून घेऊन जावी लागते तर बैलगाडी देखील घेऊन जाणे अवघड असल्याने शेतकऱ्यांना देखील मोठी अडचण निर्माण झाली आहे.