यावल (जळगाव) : येथील धोबीवाडा परिसरातील गेल्या दीड वर्षांपासून अपहृत (kidnapping case) असलेल्या तेरा वर्षांच्या मुलीचा उत्तरप्रदेशात (Uttar pradesh) शोध लागला असून, तिला घेऊन पोलिस यावलकडे येण्यासाठी निघाले आहेत. (bhusawal kidnapping case girl urttar pradesh police)

धोबीवाडा परिसरात राहणाऱ्या व मागील दीड वर्षांपूर्वी शाळेतून अपहरण करण्यात आलेल्या १३ वर्षीय मुलीच्या अपहरणाबाबत तक्रार दाखल होऊन तीनच दिवसांत उत्तर प्रदेशातून ताब्यात घेण्यात यावल पोलिसांना अखेर यश मिळाले आहे. या संदर्भात पोलिसात भिमसिंग कोळी यांनी आपल्या नातीचे (मुलीची मुलगी) १९ नोव्हेंबर २०१९ ला ती शिकत असलेल्या शाळेतून अज्ञात व्यक्तीने रिक्षात बसवून तिचे अपहरण केले असल्याची तक्रार दिली होती. याच काळात तिची आई आणि नात दोघांचा शोध घेण्याचा प्रयत्न केला. मात्र, त्या मिळून आल्या नसल्याने निराश झालेल्या आजोबांनी त्या नातीचा व त्यांची मुलगी हिचा अखेर शोध थांबविला होता.

दीड वर्षानंतर नातीचा आवाज ऐकला

मात्र, दीड वर्षानंतर अचानक नातीचा २४ एप्रिलला पहाटे चारला आजोबांना फोन आला. आणि तिने आपण कुठे आहोत ही सर्व माहिती आजोबांना दिली. त्यानंतर भिमसिंग कोळी यांनी दिलेल्या फिर्यादीवरून यावल पोलिसांनी अपहरणाचा गुन्हा दाखल करून त्या मुलीच्या शोधकार्यासाठी पोलिस उपनिरीक्षक विनोद खांडबहाले आणि सहाय्यक फौजदार विजय पाचपोळे या दोन सदस्यांच्या पथकास गोरखपूर (उतरप्रदेश) येथे पाठविले होते. या दोन्ही पोलिसांनी उत्तर प्रदेशच्या तहसील बडहलगंज (जि. गोरखपूर) येथील पोलिस ठाण्यात कार्यरत असलेले पोलिस कर्मचारी बच्चा यादव, सुशीलकुमार यादव आणि गृहरक्षक दलाचे प्रदुमल कुमार यांच्या मदतीने त्या अपहरण करण्यात आलेल्या मुलीचा शोध लावण्यात यश मिळवले आहे. तिला त्यांनी ताब्यात घेतले आहे.

पण आईचा कोरोनात मृत्‍यू

तिची आई मनीषा किरण कोळी हिचा मात्र एक महिन्यापूर्वी बडलहगंज येथे रुग्णालयात उपचार घेत असताना कोरोनामुळे मृत्यू झाल्याची प्राथमिक माहिती समोर आली आहे. येथील दोन्ही पोलिस कर्मचारी त्या मुलीला सोबत घेऊन यावल येथे येण्यासाठी रवाना झाले आहेत.