सावदा (जळगाव) : भाजप प्रदेश कार्यकारिणीची महत्त्वपूर्ण बैठक गुरुवारी (ता. २४) मुंबई येथे झाली. बैठकीत राज्याचे आगामी होणारे अधिवेशन तसेच राज्य सरकारच्या नाकर्तेपणामुळे ओबीसींचे रद्द करण्यात आलेले राजकीय आरक्षण या संदर्भात विरोधी पक्षनेते देवेंद्र फडणवीस व प्रदेशाध्यक्ष चंद्रकांत पाटील यांनी मार्गदर्शन केले. बैठकीस खासदार रक्षा खडसे जळगाव जिल्ह्यातील प्रमुख पदाधिकारी व लोकप्रतिनिधींसह दूरचित्रवाणीद्वारे जळगाव येथे उपस्थित होत्या. या बैठकीनंतर खासदार खडसे व जिल्हाध्यक्ष आमदार सुरेश भोळे यांनी पत्रकार परिषद घेऊन शनिवारी (ता. २६) भाजपतर्फे राज्यभरात ‘चक्काजाम आंदोलन’ करण्यात येणार असल्याची माहिती दिली. (jalgaon-news-bjp-chakkajam-aandolan-maharashtra-state-goverment)

स्थानिक स्वराज्य संस्थांत ओबीसींना हक्काचे आरक्षण मिळाले पाहिजे, या मागणीसाठी भाजप महाराष्ट्रतर्फे २६ जूनला राज्यभर चक्काजाम आंदोलन करण्यात येऊन याला जबाबदार राज्य सरकारचा निषेध करण्यात येणार आहे. ओबीसींना परत आरक्षण मिळण्यासाठी न्यायालयात जाऊ तसेच आरक्षण पूर्ववत होत नाही तोपर्यंत निवडणुका होऊ देणार नाही, अशी भूमिका या वेळी घेण्यात आली. या वेळी ओबीसी समाजास पुन्हा राजकीय आरक्षण मिळण्यासंदर्भात करण्यात येणाऱ्या चक्काजाम आंदोलनाविषयी खासदार रक्षा खडसे व जिल्हाध्यक्ष भोळे यांच्याकडून प्रमुख पदाधिकारी व कार्यकर्त्यांना मार्गदर्शन करण्यात आले. या वेळी जिल्हा परिषद अध्यक्षा रंजना पाटील, डॉ. राजेंद्र फडके, किशोर काळकर, संघटनमंत्री रवी अनासपुरे, आमदार संजय सावकारे, आमदार मंगेश चव्हाण, माजी आमदार स्मिता वाघ, जिल्हा परिषद उपाध्यक्ष लालचंद पाटील, माजी जिल्हा परिषद अध्यक्ष अशोक कांडेलकर, पोपटतात्या भोळे, नंदकिशोर महाजन, पद्माकर महाजन, हर्शल पाटील यांच्यासह सर्व भाजप तालुकाध्यक्ष, महिला आघाडी अध्यक्षा तसेच जळगाव जिल्ह्यातील सर्व भाजप प्रमुख पदाधिकारी व कार्यकर्ते मोठ्या संख्येने उपस्थित होते.