जळगाव : महावितरण अभियंत्यास खुर्चीला बांधल्याप्रकरणी दाखल गुन्ह्यात पोलिस कोठडीत असलेल्या आमदार मंगेश चव्हाण यांनी पहिल्या दिवशी ‘सरकारी’ भोजन केल्यानंतर रविवारी मात्र आमदार सुरेश भोळेंनी त्यांची भेट घेतली व चव्हाणांनी त्यांचा डबा स्वीकारत भोजन केल्याचे वृत्त आहे. 
महावितरणाच्या अभियंत्याला खुर्चीत बांधल्याप्रकरणी दाखल गुन्ह्यात अटकेतील आमदार मंगेश चव्हाण, यांना शनिवारी सरकारी जेवण मिळाले. पोलिस ठाण्याच्या कोठडीत आमदार महाशयांना इतर संशयित आरोपींना कोठडीत दिल्या जातात तशाच सुविधा आहेत. 

आमच्यासाठी कैदीच! 
एरवी हायप्रोफाइल व्यक्तींना व्हीआयपी सुविधा दिल्याचे ऐकण्यात, वाचण्यात येते. येथे मात्र कोठडीत आल्यावर भेदभाव न करता इतर संशयितांप्रमाणेच वागणूक होती. आपल्यासाठी गजांच्या त्या बाजूला असणारा कोणीही असो तो संशयित आरोपीच आहे. त्याच्यासाठी नोकरी कोण धोक्यात घालीन भो..., अशी चर्चा रात्री गार्ड कर्मचारी करत होते. 

मामांनी घेतली भेट 
जळगावचे आमदार सुरेश भोळे यांनी दुपारी एक ते दोनच्या दरम्यान कोठडीतील आमदार मंगेश चव्हाण यांची भेट घेतली. आमदारांच्या वैद्यकीय तपासणीनंतर लॉकअपसमोरील गार्डरूममध्ये मामांनी आणलेल्या डब्यातून आमदारांनी जेवण केल्याचे सांगण्यात आले. या भेटीनंतर स्वतः जेवणाला निघताना निरीक्षक प्रताप शिकारे यांनी ठाणे अंमलदार व गार्ड कर्मचाऱ्यांना कोठडीच्या नियमावलीने कान फुंकले.