धरणगाव (जळगाव) : पतीला कोरोनाची लागण.. उपचारासाठी अमळनेर, जळगाव येथे प्रयत्न करूनही बेड न मिळाल्याने शेवटी मुलाने पुण्याला कमांड हॉस्पिटलमध्ये दाखल केले. मात्र, इकडे उपचाराच्या चिंतेने पत्नीला हृदयविकाराच्या झटका आला, त्‍यात त्यांचा मृत्यू झाला. तर पत्नीचा मृत्यू झाल्याचे दुःख अनावर झाल्याने तिकडे पतीनेही प्राणत्याग केला. उपचारासाठी धावपळ करीत असताना दोन दिवसांत पती- पत्नीचा मृत्यू झाल्याने धरणगावातील रामकृषणनगर परिसर हादरला आहे.

धरणगाव येथील रामकृष्णनगरमधील रहिवासी तथा कला, वाणिज्य विज्ञान महाविद्यालयाचे कर्मचारी संजय तोडे यांचे वडील भीमराव तोडे यांना काही दिवसांपूर्वी कोरोनाची लागण झाली होती. उपचारासाठी संजय तोडे यांनी अमळनेर, जळगावला प्रयत्न केले. मात्र, कुठेही बेड मिळेना, शेवटी तोडे यांचा लहान भाऊ सैन्यदलात असल्याने पुणे येथे मिलिटरी हॉस्पिटलमध्ये दाखल केले.

अवघ्‍या दोन दिवसात साथ सोडली

पतीच्या उपचारासाठी मुलाची होणारी धावपळ आणि कोरोनाचा धसका संजू तोडे यांच्या वृद्ध आई वत्सलाबाई तोडे यांनी घेतला आणि पती, पुत्र पुण्याला असतानाच त्यांना घरी हृदयविकाराचा तीव्र झटका आला. त्यातच त्यांची प्राणज्योत मालवली. वत्सलाबाई यांचा लहान मुलगा, तोडे यांचे लहान भाचे-भाची आणि मुले शिवाय समरसता मंचाच्या कार्यकर्त्यांनी वत्सला यांच्यावर अंतिम संस्कार केले. तिकडे पत्नी गेल्याचे कळल्याने पती भीमराव तोडे यांनीही प्राणत्याग केला. अवघ्या दोन दिवसांत पती-पत्नीचा मृत्यू झाल्याने परिसरात हळहळ व्यक्त होत आहे.

संपादन- राजेश सोनवणे