यावल (जळगाव) : तालुक्यातील सौखेडासीम ग्रामपंचायतीमार्फत रमाई आवास योजनेंतर्गत लाभ मिळविण्यासाठी लाभार्थ्यांनी दिशाभूल करणारी माहिती प्रशासनाकडे सादर केली असून, या सर्व प्रकाराची लेखी तक्रार गावातील सामाजिक कार्यकर्ते सुनील नथ्थू भालेराव यांनी केली आहे. तीन दिवसांत चौकशी अहवाल सादर करण्याचे आदेश येथील गटविकास अधिकारी डॉ. नीलेश पाटील यांनी दिले आहेत. 
या संदर्भात सौखेडासीम येथील सुनील भालेराव यांनी येथील पंचायत समितीचे गटविकास अधिकारी डॉ. नीलेश पाटील यांना दिलेल्या तक्रारीत म्हटले आहे, की सौखेडासीम येथील अभिजित दिलीप साळवे व अशोक प्रकाश साळवे या दोघांचे अद्याप लग्न झालेले नसून ते शिक्षण घेत आहेत. असे असताना या दोघांच्या नावाने २०१९-२० या वर्षात ग्रामपंचायतीच्या वतीने रमाई आवास योजनेचा लाभ घेत आहे. 

एकत्रित कुटूंबाचा मुद्दा हेरला
एकत्रित कुटुंबात राहात असताना त्यांना घरकुलाची गरज काय? यासाठी पंचायत समितीच्या माध्यमातून या दोघांच्या घरकुलांना मान्यता मिळाली कशी? हाच मुद्दा महत्त्वाचा आहे. या दोघांचे रमाई आवास योजनेंतर्गत घरकुल तत्काळ रद्द करावे, अशी तक्रार सुनील भालेराव यांनी केली होती. या तक्रारीची तत्काळ दखल घेत गटविकास अधिकारी डॉ. नीलेश पाटील यांनी १९ मार्चला सौखेडासीम ग्रामपंचायतीला पत्र पाठवून रमाई आवास योजनेचा लाभ घेणाऱ्या अभिजित साळवे व अशोक साळवे या दोघा लाभार्थ्यांचे रेशनकार्ड वेगवेगळे आहेत का? त्यांच्याकडे स्वत:ची जागा आहे का? व ते जर एकत्र कुटुंबात रहिवास करीत असतील तर त्यांच्या कुटुंबाने यापूर्वी घरकुल योजनेचा किंवा दुरुस्तीचा लाभ घेतला आहे का? याबाबतचा सुधारित अहवाल तीन दिवसांत पंचायत समितीकडे लेखी स्वरूपात गटविकास अधिकारी यांच्या कार्यालयात सादर करावा, असे म्हटले आहे. या संदर्भात गटविकास अधिकारी डॉ. नीलेश पाटील काय निर्णय घेतात, हे विशेष आहे. दरम्यान, या संदर्भात तक्रारदार भालेराव यांनी, या प्रकरणाची तत्काळ चौकशी न झाल्यास आपण यावल पंचायत समितीसमोर बेमुदत उपोषणास बसणार असल्याचा इशारा एका पत्रकान्वये दिला आहे.