यावल (जळगाव) : तालुक्यातील डांभुर्णी येथे अवैध वाळूची वाहतूक करणारे ट्रॅक्टर महसूल विभागाच्या धडक मोहिमेत पकडण्यात आले. महसूल प्रशासनाने आठ दिवसांत केलेल्या पाचव्या कारवाईमुळे विना परवाना वाळूची वाहतूक करणाऱ्यांचे चांगलेच धाबे दणाणले आहे. 
डांभुर्णी गावाजवळच्या नाल्यात साठवण करून ठेवलेली वाळू मंगळवारी (ता. १६) पहाटेच्या सुमारास कोळन्हावी येथील पिंताबर समाधान सोळुंके हा अवैधरीत्या ट्रॅक्टरद्वारे (एमएच १९, सीयू ९८०२) वाहून नेत होता. या वेळी निवासी नायब तहसीलदार आर. के. पवार, फैजपूर मंडळातील तलाठी पी. पी. जावळे, आमोदे येथील तलाठी एम. पी. खुर्दा, पोलिस कर्मचारी भूषण चव्हाण, चालक हिरामण सावळे यांनी विनापरवाना वाळूची वाहतूक करताना संबंधिताला ट्रॅक्टरसह ताब्यात घेतले. या विनापरवाना वाळूची वाहतूक करणाऱ्या ट्रॅक्टरचालकावर दंडात्मक कारवाई करण्यात येणार असल्याची माहिती निवासी नायब तहसीलदार पवार यांनी दिली. 

आठ दिवसात पाचवी कारवाई
महसूलच्या वाळूमाफियाविरुद्ध सुरू केलेल्या मोहिमेंतर्गत आठ दिवसातील पाचवी कारवाई झाल्याने वाळूमाफियांवर चांगलाच वचक बसल्याचे दिसून येत आहे. या वेळी महसूलच्या पथकाने घटनास्थळी जाऊन वाळूचा पंचनामा करून ट्रॅक्टर जमा केले आहे. दरम्यान, वाळूची वाहतूक करणाऱ्या ट्रॅक्टरचालकाने कारवाईच्या भीतीने वाहन घेऊन पळून जाण्याचा देखील प्रयत्न केला. मात्र, महसूलचे वाहनचालक हिरामण साळवे यांनी समयसुचकता बाळगून वाळूची वाहतूक करणाऱ्या ट्रॅक्टरचा अत्यंत खडतर मार्गावरून सुमारे पाच किलोमीटर पाठलाग करून वाहनास पकडण्यात यश मिळवले. 

संपादन ः राजेश सोनवणे